धादिङ : धादिङको नीलकण्ठ नगरपालिका–१४ रङगाउँस्थित भित्री सडक खण्डमा आइचर गाडी दुर्घटना हुँदा ४ जना घाइते भएका छन्।
ओलीडाँडाबाट देविथान सामुदायिक जंगलतर्फ साल काठ लिन जाँदै गरेको आइचर गाडी अनियन्त्रित भई करिब २ सय मिटर तल भिरमा खसेको प्रहरीले जनाएको छ। गाडीमा सवार ९ जनामध्ये ४ जना घाइते हुँदा अन्य ५ जना सकुशल रहेका छन्।
घटनापछि हरिचोक धुवाकोटबाट खटिएको प्रहरी टोली र स्थानीयको सहयोगमा घाइतेहरूको उद्धार गरिएको थियो। प्रारम्भिक उपचारपछि सबै घाइतेलाई थप उपचारका लागि काठमाडौंस्थित राष्ट्रिय ट्रमा सेन्टर रिफर गरिएको छ।
घाइते हुनेहरूमा नीलकण्ठ-१ बस्ने २४ वर्षीय चालक सुमन अधिकारी सोही ठाउँका १५ वर्षीय ईसान विक, गंगाजमुना गाउँपालिका-३ का २१ वर्षीय अशोक तामाङ र मकवानपुर राक्सिराङ-७ का ३२ वर्षीय नवीन जरा रहेका छन्। उनीहरूको अवस्था सामान्य रहेको प्रहरीले जनाएको छ।
प्रतिक्रिया दिनुहोस !
