वीरेन्द्रनगर : कर्णालीमा व्यवसायीहरुको आन्दोलनले यातायात सेवा ठप्प भएको छ । प्रहरीले रातो नम्बर प्लेटका जीपहरुलाई यात्रु बोक्न रोक लगाउन नसक्दा समितिका मजदुरहरुले यात्रु बोकेका रातो नम्बर प्लटका गाडी रोक्न खोज्दा प्रहरीले सुर्खेत बसपार्कबाट ५ जना मजदुरहरुलाई पक्राउ गरी मुद्दा चलाएको बिरोधमा कर्णालीमा सञ्चालन भएको सबै यातायात व्यवसायीहरुले सेवा ठप्प पारेका हुन् ।
प्रहरीको ‘पक्षपातपूर्ण’ कारबाहीको विरोधमा सुर्खेतका यातायात व्यवसायीहरूले शुक्रबारदेखि सबै सार्वजनिक यातायात सेवा बन्द गर्ने निर्णय गरेको देउति नागरिक यातायात समितिका अध्यक्ष कमल खड्का (जुनी) ले बताए । उनका अनुसार जिल्लामा सञ्चालनमा रहेका १३ वटा यातायात प्रालिहरूले संयुक्त रूपमा बिहीबार बैठक बसेर यस्तो निर्णय गरेपछि शुक्रबारदेखि कर्णालीमा सार्वजानिक यातायात सेवा ठप्प छ ।
प्रहरीले सार्वजनिक सवारीका चालक तथा मजदुरमाथि अनावश्यक धरपकड गरेको आरोप छ । उनले भने, ‘प्रहरीले गर्ने काम सार्वजनिक यातायात समितिमा कार्यरत कर्मचारीले गर्दा प्रहरीले व्यवसायीहरुलाई दुःख दिने काम गरेको छ । यसले रातो नम्बर प्लेटका गाडीहरुसँग प्रहरीको कुनै लेनदेन भएको हुन सक्ने शंका छ ।’
यातायात व्यवसायीहरूले निजी प्रयोजनका लागि दर्ता भएका रातो नम्बर प्लेटका सवारीसाधनहरूलाई नियन्त्रणमा लिनुपर्नेमा त्यसतर्फ कुनै कडाइ नगरी उल्टै सार्वजनिक सवारीमाथि मात्र दबाब सिर्जना गरिएको बताएका छन् । उनीहरूको भनाइमा रातो प्लेटका सवारीहरू खुला रूपमा सञ्चालन भइरहँदा सार्वजनिक सवारीलाई मात्र लक्षित गरेर कारबाही गर्नु अन्यायपूर्ण र विभेदपूर्ण व्यवहार हो ।
मध्यपश्चिम यातायात व्यवसायी समितिका सचिव रमेश सापकोटाले प्रहरीद्धारा भएको बिभेदपूर्ण कारबाही बन्द नभए सार्वजनिक यातायात पूर्णरुपमा ठप्प पार्ने बताए । उनले समान रूपमा नियम कार्यान्वयन नभएसम्म आन्दोलनका कार्यक्रमहरूलाई निरन्तरता दिने चेतावनी समेत दिए ।
व्यवसायीको आन्दोलनका कारण शुक्रबारदेखि सुर्खेतबाट सञ्चालन हुने लामो तथा छोटो दूरीका सम्पूर्ण सवारी सेवा प्रभावित भएका छन् । दैनिक रूपमा आवतजावत गर्ने सर्वसाधारण, विद्यार्थी, कर्मचारी तथा व्यापारीहरूलाई सास्ती भएको छ । आकस्मिक सेवा बाहेकका अधिकांश सवारी साधन सञ्चालनमा नआउँदा स्वास्थ्य सेवा, बजार आपूर्ति र अन्य अत्यावश्यक क्षेत्रमा समेत प्रभाव पर्ने अनुमान गरिएको छ ।
प्रदेश प्रहरी कार्यालयका प्रवक्ता एसएसपी राम शाहले यात्रु तानातान गरेको कारण सुर्खेतमा प्रहरीले ५ जना यातायात व्यवसायीका कर्मचारीहरु पक्राउ गरेको बताए । उनका अनुसार सुर्खेत बसपार्कमा हुने यात्रु तानातान रोक्न र सबैको सहजताका लागि व्यवसायी र प्रहरीबीच समन्वय भईरहेको बताए ।
सार्वजानिक यातायत समितिहरुले यातायात सेवा ठप्प पार्दा सुनसान सुर्खेत जुम्ला सडक । तस्बिर : बिस्नप्रसाद न्यौपाने
प्रतिक्रिया दिनुहोस !
