रौतहट : चन्द्रपुर नगरपालिका–४ मा मदिरा सेवन गरेर एक युवकले बाटो हिँडिरहेका अर्का युवकलाई धकेल्दा उनको मृत्यु भएको छ । घटनामा संलग्न रहेको आरोपमा प्रहरीले एक जनालाई पक्राउ गरी अनुसन्धान अघि बढाएको छ ।
मृत्यु हुनेमा चन्द्रपुर नगरपालिका–४ निवासी ३० वर्षीय विष्णु सुवेदी रहेका छन् । जिल्ला प्रहरी कार्यालय रौतहटका प्रमुख, प्रहरी उपरीक्षक सीताराम रिजालका अनुसार उपचारका क्रममा गए राति सुवेदीको मृत्यु भएको हो । उपरीक्षक रिजालका अनुसार बारा जिल्लाको निजगढ नगरपालिका–६ घर भई हाल चन्द्रनिगाहपुरमा डेरा गरी बस्दै आएका ३८ वर्षीय विमल मोक्तानले मदिरा सेवन गरेको अवस्थामा बाटोमा हिँडिरहेका सुवेदीलाई धक्का दिएका थिए ।
घटनाका बेला मोक्तान र उनकी श्रीमतीबीच सडकमै झगडा भइरहेको बताइएको छ । सोही क्रममा त्यहाँबाट हिँडिरहेका विष्णु सुवेदीलाई मोक्तानले एक्कासी धकेलेपछि उनी बाटोमै लडेर गम्भीर घाइते भएका थिए ।
स्थानीयवासीका अनुसार लड्ने बित्तिकै सुवेदी केहीबेर मुर्छित अवस्थामा रहेका थिए । स्थानीय तथा आफन्तले तत्कालै सुवेदीलाई चन्द्रनिगाहपुरस्थित रिसरेखा अस्पतालमा उपचारका लागि पुर्याएको भए पनि अस्पतालमा प्रारम्भिक उपचारपछि चिकित्सकले थप उपचारका लागि बाहिर रेफर गर्न सुझाव दिएका थिए । तर, आर्थिक अवस्थाका कारण परिवारले उनलाई घरमै लगेको थियो ।
घर फर्काइएका सुवेदीको स्वास्थ्य अवस्था रातभर बिग्रिँदै गएको र गए राति करिब १२ बजे उनको मृत्यु भएको उपरीक्षक रिजालले जानकारी दिए । प्रहरीले आरोपित विमल मोक्तानलाई नियन्त्रणमा लिएर घटनाबारे थप अनुसन्धान गरिरहेको उपरीक्षक रिजालले जानकारी दिए ।
प्रतिक्रिया दिनुहोस !
