प्रधानमन्त्री कप क्रिकेट : नेपाल पुलिसले पायो १६३ रनको लक्ष्य

वीरगन्ज : प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत मंगलबार जारी खेलमा कोशी प्रदेशले नेपाल पुलिस क्लबलाई १६३ रनको लक्ष्य प्रस्तुत गरेको छ । वीरगन्जस्थित नारायणी क्रिकेट मैदानमा जारी प्रतियोगिता टस हारेर ब्याटिङ गरेको कोशीले ४३.५ ओभरमा सबै विकेट गुमाउँदै एक सय ६२ रन जोडेको हो ।

कोशीका लागि कप्तान सुजन थपलियाले ४८, ओपनर सुमन श्रेष्ठले ४३, अंकित सुवेदीले २६, शिवांश बजगाईंले १५ रन बनाए । कोशी अन्य ब्याटरले दोहोरो अंकमा रन बनाउन सकेनन् । कोशीलाई मध्यम योगफलमा रोक्ने क्रममा पुलिसका दिनेश खरेल एक्लैले पाँच विकेट लिए । खरेलले सोनु अंसारी, समिर कार्की, प्रेम कामत, शिवांश बजगाईं र विपिन महतोको विकेट लिँदै फाइफर पूरा गरे । यसै गरी ललित राजवंशी र सागर ढकालले समान दुई÷दुई विकेट लिए ।

कोशीले दिएको लक्ष्य पछ्याउन पुलिसका ओपनर दिनेश खरेल र शंकर राना मैदानमा उत्रिएका छन् । जारी प्रतियोगितामा पुलिसले वीरगन्जमा खेलेको यो पहिलो खेल हो । प्रतियोगितामा पाचौं खेल खेल्दै गरेको पुलिसले यसअघि काठमाडौंस्थित माथिल्लो मुलपानी मैदानमा तीन र तल्लो मुलपानी मैदानमा एक खेल खेलेको थियो । पुलिस पाँच अंकसहित तालिकाको चौंथो स्थानमा छ ।

पहिलो खेलमा त्रिभुवन आर्मीसँग २२ रनले पराजित भएको पुलिसले दोस्रो खेलमा नेपाल एपीएफ क्लबलाई १८५ रन र तेस्रो खेलमा बागमती प्रदेशलाई सात विकेटले पराजित गरेको थियो । चौंथो खेलमा भने वर्षा बाधक बनेपछि पुलिसले गण्डकीसँग अंक बाँडेको थियो ।

यता पाँचौं खेल खेल्दै गरेको कोशीले कुनै पनि खेल जित्न सकेको छैन । पहिलो खेलमा वर्षा बाधक भएपछि मधेससँग अंक बाँडेको कोशीले त्यसयताका सबै खेलमा पराजय व्यहोरेको छ । कोशीले दोस्रो खेलमा लुम्बिनीसँग १४८ रन, तेस्रो खेलमा कर्णालीसँग १६ रन र चौथो खेलमा सुदूरपश्चिमसँग सात विकेटको हार व्यहोरेको थियो । कोशी अंकतालिकाको अन्तिममा छ ।

नेपाल क्रिकेट संघको आयोजनामा चैत ७ गतेदेखि जारी प्रतियोगिताको विजेताले १० लाख र उपविजेताले पाँच लाख प्राप्त गर्नेछ । सात प्रदेश र तीन विभागीय गरी १० टिमको सहभागिता रहेको प्रतियोगिताको उत्कृष्ट चार टोली आगामी जय ट्रफीका लागि छनौट हुनेछन् ।