एजेन्सी/लन्डन : केप भर्डे यस विश्वकपको प्रेरणादायी टोलीका रूपमा उदाउँदा त्यसका नायक बनेका थिए, ४० वर्षीय गोलरक्षक भोजिन्हा । भोजिन्हाले विश्वकप विजेता स्पेन, उरुग्वे र अर्जेन्टिनाजस्ता सशक्त टोलीसँग मात्रै होइन, साउदी अरेयिबासँग पनि सानदार प्रदर्शन गरेका थिए ।
स्पेनसँगको खेलमा उत्कृष्ट ८ बचाउ गरेका उनले अर्जेन्टिनासँगको खेलमा पनि ७ बचाउ गरेका थिए । केप भर्डेको पोस्ट्मा पर्खाल जसरी उभिने उनलाई ‘दी वाल’का रुपमा धेरैले चर्चा गर्दै आएका छन् ।
उनै चर्चित गोलरक्षक भोजिन्हाको सम्मानमा वैज्ञानिकहरूले नयाँ समुद्री जीवको नामकरण गरेका छन् । स्पेनका समुद्री जीव वैज्ञानिक जेसुस ओर्टेआले पत्ता लगाएको नयाँ समुद्री मोलस्कको नाम ‘अल्डिसा भोजिन्हा’ राखेका हुन् । यो नाम केप भर्डेको विश्वकप यात्रामा भोजिन्हाले गरेको उत्कृष्ट प्रदर्शनको सम्मानमा दिइएको हो ।
अनुसन्धानकर्ताका अनुसार यो करिब चार मिलिमिटर लामो रातो रङको समुद्री स्लग क्यारेबियन क्षेत्रमा संकलन गरिएको हो । यसको नमुनाको अध्ययनपछि नयाँ प्रजातिका रूपमा पहिचान गरिएको थियो ।
७५ वर्षीय ओर्टेआले आफ्नो अनुसन्धान प्रतिवेदनमा विश्वकपमा भोजिन्हाले खेलेको असाधारण भूमिकाको सम्मानस्वरूप यो नामकरण गरिएको बताएका हुन् । उनले यो प्रजातिको रातो रङले स्पेनको उपनाम ‘ला रोजा’ (द रेड वन) विरुद्ध भोजिन्हाले गरेको उत्कृष्ट प्रदर्शनको पनि सम्झना गराउने उल्लेख गरेका छन् ।
ओर्टेआले यसअघि पनि फुटबलप्रतिको आफ्नो प्रेमलाई वैज्ञानिक अनुसन्धानसँग जोड्दै कोस्टारिकाका पूर्वगोलरक्षक केलर नावासको नाममा एउटा नयाँ प्रजातिको नाम राखेका थिए ।
प्रतिक्रिया दिनुहोस !
