दोलखा : दोलखाको गौरीशङ्कर गाउँपालिका– ९ मुलखर्कमा रहेको ९ मेगावाटको सिप्रिङ खोला जलविद्युत आयोजनाको ड्याम मंगलवार रातिको अविरल बर्षाका कारण पूर्णरुपमा क्षति भएको छ । पहिरोमा परी स्थानीय ७५ बर्षीय चसमान तमाङ बेपत्ता भएको जिल्ला प्रहरी कार्यालय दोलखाले जनाएको छ ।
मंगलवार राति ११ः३० बजेतिर सिप्रिङ खोलामा बाढी आएपछि सिप्रिङ खोला जलविद्युत आयोजनाको ड्याम पुरिएको र आयोजनामा रहेको आफूसहित अन्य साथीहरु डिलमा बसेर बचेको आयोजनाका कर्मचारी मनिक श्रेष्ठ (मनिक बिनोद श्रेष्ठ) ले बताए ।
आयोजनाको ड्याम नजिक गाई गोठ राखेर बसेका चसमान तमाङ र उनको गोठमा रहेको १० वटा गाई तथा २५ भन्दा बढी खसी– बाख्रा बगाएको श्रेष्ठले बताए । आयोजनाको ड्याम साइटमा बस्दै आएको आफूसहित सुकदेव श्रेष्ठ, कल्याण विश्वकर्मा र सूर्यबहादुर तमाङ ड्याम भन्दा माथिको डिलबाट स्थानीयको सहयोगमा सुरक्षित निस्किएको मनिक श्रेष्ठले बताए ।
सिप्रिङ खोला आयोजनाको ड्याममा पहिरोले क्षति पुगेको जानकारी आएपछि वडाले आवश्यक समन्वय गरी उद्दार तथा खोजीको काम गरिरहेको गौरीशंकर गाउँपालिका– ९ का वडा अध्यक्ष निमगेली शेपाले बताए । पहिरोमा हराएका मानिसको खोजीको लागि नेपाली सेना, नेपाल प्रहरी र सशस्त्र प्रहरी बलको टोली परिचालित भएको जिल्ला प्रहरी कार्यालय दोलखाले जनाएको छ ।
प्रतिक्रिया दिनुहोस !
