धादिङ : पृथ्वी राजमार्ग अन्तर्गत धादिङको धार्के बजार क्षेत्रमा सडक कालोपत्रेको काम सुरु भएको छ । लामो समयदेखि सुस्त गतिमा अघि बढिरहेको सडक विस्तार तथा स्तरोन्नति आयोजनाले पछिल्लो समय गति लिएसँगै स्थानीयवासी, व्यवसायी र यात्रुमा राहतको आशा जागेको छ ।
काठमाडौं–पोखरा जोड्ने पृथ्वी राजमार्गको महत्वपूर्ण व्यापारिक केन्द्रका रूपमा रहेको धार्के बजारमा सडक निर्माणको काम लम्बिँदा स्थानीयले धुलो, हिलो र जामको समस्या झेल्दै आएका थिए । विशेष गरी सुक्खा याममा अत्यधिक धुलो र वर्षायाममा हिलोका कारण जनजीवन प्रभावित हुने गरेको थियो। स्थानीय व्यवसायी हरि तिमिल्सिनाले सडक निर्माणमा भएको ढिलाइले व्यापार व्यवसायमा प्रत्यक्ष असर परेको बताए । उनका अनुसार धुलोका कारण पसलमा राखिएका सामान बिग्रने, ग्राहक आउन असहज मान्ने र बजारको वातावरण प्रभावित हुने अवस्था थियो ।
स्थानीय आशिष ठकुरीले सडकको दुरावस्थाका कारण यात्रु तथा सवारी चालकले लामो समयदेखि सास्ती खेप्नु परेको बताए । जाम, खाल्डाखुल्डी र निर्माण सामग्रीका कारण यात्रा कठिन बन्नुका साथै दुर्घटनाको जोखिम समेत बढेको उनको भनाइ छ । नागढुंगा–मुग्लिन सडक आयोजना (पूर्वी–खण्ड) का प्रमुख केशवप्रसाद ओझाले धार्के बजार क्षेत्रमा कालोपत्रेको काम सुरु भएको जानकारी दिए । उनले निर्माण कार्यलाई तीव्रता दिइएको र तोकिएको समयभित्र सम्पन्न गर्ने लक्ष्य रहेको बताए ।
प्रतिक्रिया दिनुहोस !
