कलैया : रौतहट र महोत्तरीले मधेस टी-२० क्रिकेट लिगको दोस्रो संस्करणमा विजयी सुरुवात गरेका छन् । बारा र पर्सामा सुरु भएको प्रतियोगिताको पहिलो दिनमा रौतहटले सर्लाहीलाई र महोत्तरीले पर्सालाई पराजित गरेको हो।
वीरगन्जस्थित टिबी शाह रंगशालामा भएको खेलमा महोत्तरीले पर्सामाथि ९ विकेटको जित निकालेको हो । पर्साले दिएको ७८ रनको लक्ष्य ७.५ ओभरमा पूरा गर्दै महोत्तरीले दुई अंक जोड्यो ।
महोत्तरीका लागि ओपनर रविकुमार सिंहले अविजित ५० रन बनाए । प्लेयर अफ दि म्याच सिंहले २७ बलमा सात चौका र दुई छक्का प्रहार गर्दै अर्धशतक पूरा गरे । अर्का ओपनर महमद सर्फराज अंसारीले २० रन बनाए । पर्साका बलर अनुजकुमार चौहानले एक विकेट लिँदा अन्य बलर चल्न सकेनन् ।
यसअघि टस हारेर ब्याटिङ गरेको पर्साले १७.४ ओभरमा सबै विकेट गुमाएर ७७ रन जोडेको थियो । पर्साका महमद समीरले २३ र चन्दन रामले १६ रन बनाउँदा अरु ब्याटरले दोहोरो अंकमा रन जोड्न सकेनन् ।
महोत्तरीका रमेश सहनी र आकाश मण्डलले तीन÷तीन विकेट लिए । यस्तै रविकुमार सिंहले दुई र नितेश यादवले एक विकेट हात पारे ।
यसैगरी अर्को खेलमा रौतहटले सर्लाहीलाई ६ विकेटले पराजित गर्दै दुई अंक जोडेको छ । टस जितेर ब्याटिङ गरेको सर्लाहीले १६.१ ओभरमा सबै विकेट गुमाएर ५९ रन जोडेको थियो । सर्लाहीका अलि हसनले १८ र हेमन्त सिंहले १६ रन बनाए । अन्य ब्याटरले राम्रो प्रदर्शन गर्न सकेनन् ।
रौतहटका मुकेश राम एक्लैले चार विकेट लिए । राम प्लेयर अफ दि म्याच घोषित भए । यस्तै राजेश यादव, आशिक बैठा र डब्लु मल्लिकले दुई-दुई विकेट लिए ।
सर्लाहीले दिएको ६० रनको लक्ष्य पछ्याउन मैदानमा उत्रिएको रौतहटले ८.१ ओभरमा चार विकेट गुमाउँदै जित निकाल्यो । रौतहटका बिजय गुप्ताले ३४ र डब्लु मल्लिकले १५ रन बनाए । सर्लाहीका अभय यादवले चार विकेट लिए ।
यसैगरी कलैयास्थित सिद्धेश्वर खेल मैदानमा तय भएका दुई खेल भने खराब मौसमका कारण रद्द भएका छन् । बारा र सप्तरी तथा धनुषा र सिरहाबीचको खेल रद्ध भएको मधेस प्रदेश क्रिकेट संघका कोषाध्यक्ष सुभाष जयसवालले जानकारी दिए ।
खेल रद्द भएपछि चार वटै टोलीले एक÷एक अंक बाँडेका छन् । प्रतियोगिता अन्तर्गत बिहीबार सिद्धेश्वर खेल मैदानमा दुई खेल हुनेछन् । पहिलो खेलमा सिरहा र सप्तरी भिड्नेछन् भने दोस्रो खेल बारा र धनुषाबीच हुनेछ ।
यसैगरी टिबी शाह मैदानमा हुने पहिलो खेलमा पर्सा र रौतहट भिड्नेछन् भने दोस्रो खेलमा महोत्तरी र सर्लाहीबीच प्रतिस्पर्धा हुनेछ । वीरगन्जस्थित टिबी शाह मैदानमा भएको खेलको उद्घाटन मधेस प्रदेश खेलकुद परिषद्का सदस्य सचिव शिवजी गुप्ताले उद्घाटन गरेका थिए । प्रतियोगिता जेठ ८ गतेसम्म संचालन हुनेछ ।
राउण्ड रोबिन आधारमा हुने प्रतियोगिताको शीर्ष चार टिम सेमिफाइनलमा प्रवेश गर्नेछन् । प्रतियोगिताको पहिलो संस्करणको उपाधि बाराले जितेको थियो ।
प्रतिक्रिया दिनुहोस !
