गणेश नेपाली मृत्यु प्रकरण : डीआइजी थपलियाको नेतृत्वमा सरकारले बनायो छानविन समिति

काठमाडौं : काठमाडौँको त्रिपुरेश्वरस्थित राहदानी विभाग परिसरमा आत्मदाह प्रयास गरेका २५ वर्षीय युवा गणेश नेपाली उपचारका क्रममा मृत्यु भएपछि सरकारले घटना छानबिनका लागि उच्चस्तरीय समिति गठन गरेको छ ।

शुक्रबार प्रतिनिधि सभा बैठकलाई सम्बोधन गर्दै गृहमन्त्री सुधन गुरुङले नेपाल प्रहरीका प्रहरी नायब महानिरीक्षक (डीआईजी) गोविन्द थपलियाको नेतृत्वमा ५ सदस्यीय छानबिन समिति गठन गरिएको जानकारी दिएका हुन् । गृहमन्त्री गुरुङका अनुसार घटनाको सत्यतथ्य पत्ता लगाउन र निष्पक्ष अनुसन्धान अघि बढाउन काठमाडौँ महानगरपालिकाका ३ जना नगर प्रहरीलाई समेत नियन्त्रणमा लिएर सोधपुछ थालिएको छ ।

त्रिपुरेश्वरमा जरिवाना तिर्ने विषयमा विवाद हुँदा नेपालीले आत्मदाहको प्रयास गरेका थिए । ५५ प्रतिशतभन्दा बढी शरीर जलेका नेपालीको वीर अस्पतालमा उपचारका क्रममा शुक्रबार बिहान ११ः १९ बजे निधन भएको अस्पताल स्रोतले जानकारी गराएको छ । संसदमा बोल्दै गृहमन्त्रीले घटनाप्रति गहिरो दुःख व्यक्त गर्दै सरकारको अथक प्रयासका बाबजुद नेपालीलाई बचाउन नसकिएको बताए । उनले घटनाको वास्तविकता पत्ता लगाई दोषीलाई कानुनी दायरामा ल्याउने प्रतिबद्धता जनाए ।