फ्रान्स पुगे प्रधानमन्त्री मोदी : जी–७ बैठकदेखि ट्रम्पसँग भेटसम्म, एजेन्डामा के–के ?
जेठ ३१, २०८३ आइतबार ११:१:१५
भारत : भारतीय प्रधानमन्त्री नरेन्द्र मोदी जी–७ शिखर सम्मेलनमा सहभागी हुन फ्रान्स पुगेका छन् । करिब ६ दिने विदेश भ्रमणमा रहेका मोदी आइतबार निस पुगेका हुन् । त्यहाँ उनले भारत इनोभेट्स २०२६ को उदघाटन गर्ने तथा विभिन्न सम्मेलन र उच्चस्तरीय भेटघाटमा सहभागी हुने कार्यक्रम छ ।
फ्रान्स पुगेपछि सामाजिक सञ्जाल एक्समार्फत मोदीले निस, एभियन र पेरिसमा हुने कार्यक्रमहरूमा सहभागी हुने जानकारी दिँदै यस भ्रमणले भारत र उसका प्रमुख विकास साझेदारबीचको सम्बन्ध अझ सुदृढ बनाउन मद्दत गर्ने बताएका छन् । फ्रान्समा भारतीय समुदायले उनको भव्य स्वागत गरेको बताइएको छ ।
भारत इनोभेट्स २०२६ को उद्घाटन
म्याक्रोंसँग द्विपक्षीय वार्ता
भारत इनोभेट्स कार्यक्रमअघि मोदी र म्याक्रोंबीच द्विपक्षीय भेटवार्ता हुनेछ । दुवै नेताले भारत–फ्रान्सबीचको ‘विशेष विश्वव्यापी रणनीतिक साझेदारी’लाई अझ मजबुत बनाउने विषयमा छलफल गर्नेछन् । ऊर्जा, कृत्रिम बुद्धिमत्ता, नवप्रवर्तन तथा सुरक्षा सहकार्यका विषय पनि छलफलमा रहने अपेक्षा गरिएको छ ।
जी–७ शिखर सम्मेलनमा सहभागिता
फ्रान्सको एभियनमा हुने जी–७ शिखर सम्मेलनमा मोदी सहभागी हुनेछन् । भारतलाई विगत केही वर्षदेखि लगातार जी–७ सम्मेलनमा आमन्त्रित गरिँदै आएको छ । यस पटक भारतसँगै ब्राजिल, इजिप्ट, केन्या र दक्षिण कोरिया पनि सहभागी हुनेछन् ।
ट्रम्पसँग सम्भावित भेट
भारतीय प्रधानमन्त्री मोदी र अमेरिकी राष्ट्रपति डोनाल्ड ट्रम्पबीच करिब १६ महिनापछि द्विपक्षीय भेटवार्ता हुने अपेक्षा गरिएको छ । अमेरिकी अधिकारीहरूले यसको संकेत दिएका भए पनि भारतको विदेश मन्त्रालयले औपचारिक पुष्टि गरेको छैन ।
हालै ओमान नजिक अमेरिकी मिसाइल आक्रमणमा तीन भारतीय नागरिकको मृत्यु भएपछि भारत–अमेरिका सम्बन्धबारे नयाँ बहस सुरु भएको सन्दर्भमा यो भेटलाई विशेष महत्वका साथ हेरिएको छ ।
वीभा टेक कार्यक्रममा सहभागिता
जुन १८ मा मोदीले पेरिसमा म्याक्रोंसँगै वीभा टेक कार्यक्रममा सहभागिता जनाउने छन् । यो युरोपकै सबैभन्दा ठूलो प्रविधि तथा स्टार्टअप सम्मेलन मानिन्छ । कार्यक्रममा विश्वभरका अग्रणी स्टार्टअप र प्रविधि कम्पनीहरूको सहभागिता रहनेछ । त्यसपछि मोदीले फ्रान्सस्थित भारतीय समुदायसँग पनि अन्तरक्रिया गर्ने सम्भावना छ ।
स्लोभाकिया भ्रमण
फ्रान्स भ्रमणपछि मोदी स्लोभाविकया जानेछन् । सन् १९९३ मा स्वतन्त्र राष्ट्र बनेको स्लोभाकियाको भ्रमण गर्ने उनी पहिलो भारतीय प्रधानमन्त्री हुनेछन्। यो भ्रमणले भारत–स्लोभाकिया सम्बन्धलाई नयाँ उचाइमा पुर्याउने अपेक्षा गरिएको छ ।
प्रतिक्रिया दिनुहोस !
