लाइसेन्सको स्वास्थ्य परीक्षणमा अनियमितताको आशंका, इटहरीका यातायात प्रमुख हटाइए

विराटनगर : सुनसरीको इटहरीस्थित यातायात व्यवस्था कार्यालय (सवारी चालक अनुमति पत्र) मा स्वास्थ्य परीक्षणसम्बन्धी अनियमितताको गम्भीर आरोप लागेपछि कार्यालय प्रमुख सतिश सत्याललाई जिम्मेवारीबाट हटाइएको छ । 

अनियमितताको आशंकासँगै उनलाई जिम्मेवारीबाट मुक्त गरेर कोशी प्रदेशको आन्तरिक मामिला तथा कानुन मन्त्रालय तानिएको छ । बढ्दो गुनासो र अनुगमनबाट भेटिएको कैफियतका आधारमा विराटनगरस्थित मन्त्रालय तानेर उनीमाथि औपचारिक छानबिन सुरु गरिएको छ । मन्त्रालयका सचिव आस्मान तामाङका अनुसार बिहीबारको निर्णयअनुसार सत्याललाई मन्त्रालयमा तानिएको हो । हाल सत्याल मन्त्रालयमा हाजिर भए पनि कुनै जिम्मेवारी दिइएको छैन । छानबिन निष्पक्ष बनाउन उनलाई सक्रिय जिम्मेवारीबाट अलग राखिएको मन्त्रालयले जनाएको छ ।

सत्यालमाथि लाइसेन्स जारी वा नवीकरणका क्रममा स्वास्थ्य परीक्षण (मेडिकल) मा फेल भएका व्यक्तिलाई पास गराएको आरोप छ । सेवाग्राहीबाट पटक–पटक गुनासो आएको सचिव तामाङ बताउँछन् । यो गुनासो मन्त्री इन्द्रमणि पराजुलीसम्म पनि पुगेको थियो । मन्त्री पराजुलीको निर्देशनपछि सचिव तामाङकै नेतृत्वमा यातायात कार्यालयमा छड्के अनुगमन भयो ।

अनुगमनका क्रममा चिकित्सकले अनुत्तीर्ण ठहर गरेका सेवाग्राहीलाई पनि उत्तीर्ण गराइएको भेटिएको मन्त्रालयको दाबी छ । त्यसलगत्तै सत्याललाई हटाएर मन्त्रालय तानिएको हो । अनुगमन टोलीले उनको कार्यकक्षको दराज समेत शिल गरेको छ । मन्त्रालयका अनुसार यसअघि पनि सत्याललाई मौखिक रूपमा सचेत गराइएको थियो । तर, सुधार नआएका कारण पछिल्लो अनुगमनपछि कडा कदम चालिएको मन्त्रालयले जनाएको छ । 

लामो समयदेखि यातायात कार्यालयहरूमा स्वास्थ्य परीक्षण प्रक्रियामा नक्कली परीक्षण, आर्थिक चलखेल र रिपोर्ट मिलाउने जस्ता गुनासो आउने गरेका थिए । यस्तो समस्या रोक्न मन्त्रालयले कात्तिक १६ गतेदेखि झापा, इटहरी र विराटनगरका यातायात कार्यालयहरूमा विशेषज्ञ चिकित्सक नियुक्त गरेको थियो । ती चिकित्सकले दिने स्वास्थ्य प्रतिवेदनलाई आधार मानेर मात्रै लाइसेन्स प्रक्रिया अगाडि बढाउने व्यवस्था गरिएको छ । तर, सत्यालले त्यसलाई उल्लंघन गर्दै स्वास्थ्य परीक्षणमा अनुत्तीर्ण भएकालाई उत्तीर्ण गराउने गरेको पाइएको मन्त्रालयको दाबी छ । 

यस विषयमा बुझ्न खोज्दा सत्यालसँग सम्पर्क हुन सकेन । उनी मोबाइल अफ गरेर बसेका छन् । तर, सत्यालले भने आरोप अस्वीकार गर्ने गरेको एक कर्मचारीले बताए । आफूले सेवाग्राहीलाई सहज बनाउन ‘रिचेक’ अर्थात् पुनः परीक्षणको सिफारिस गर्ने गरेको र त्यसैलाई गलत रूपमा व्याख्या गरिएको सत्यालले बताउने गरेको ती कर्मचारीको भनाइ छ । 

यता मन्त्रालयले भने समिति नै गठन गरेर छानबिन सुरु गरेको छ । घटनाको सत्य तथ्य पत्ता लगाउन यातायात व्यवस्था महाशाखा प्रमुख उर्मिला निरौलाको संयोजकत्वमा पाँच सदस्यीय छानबिन समिति गठन गरिएको छ । आइतबारबाट काम सुरु गरेको समितिलाई दुई साताभित्र प्रतिवेदन बुझाउन समय दिइएको छ ।

सोही प्रतिवेदनका आधारमा थप कारबाही अघि बढाइने सचिव तामाङले बताए । कार्यालयको दैनिक कामकाज सञ्चालनका लागि वरिष्ठ शाखा अधिकृत सुभाष कार्कीलाई निमित्त प्रमुखको जिम्मेवारी दिइएको छ । मन्त्रालयले छानबिनबाट तथ्य स्पष्ट भएसँगै यातायातमा आवश्यक सुधार र कारबाही प्रक्रिया अघि बढाइने जनाएको छ ।