बालेन लक्षित ओलीको कटाक्ष : प्रश्न छलेर आफूलाई राम्रो देखाउने राजनीति गरेनौं

काठमाडौं : पूर्व प्रधानमन्त्री तथा नेकपा एमालेका अध्यक्ष केपी शर्मा ओलीले रास्वपाका वरिष्ठ नेता बालेन्द्र शाह (बालेन) लाई लक्षित गर्दै प्रश्न छलेर आफूलाई राम्रो देखाउन राजनीति नगरेको टिप्पणी गरेका छन् । 

झापा–५ का उम्मेदवारसँग मंगलबार सार्वजनिक छलफल कार्यक्रम थियो । त्यसमा झापा–५ का सबै उम्मेदवार सहभागी भए पनि रास्वपा उम्मेदवार शाह सहभागी भएनन् । त्यसलाई लिएर बुधबार ओलीले सामाजिक सञ्जालमार्फत बालेन लक्षित कटाक्ष गरेका हुन् । उनले अहिलेसम्म आफूमाथि उठेका प्रश्नको जवाफ दिएको बताएका छन् । 

‘हामीले आफूमाथि उठेका प्रश्नको उत्तर दिँदै आएका छौं । त्यसैले हामीमाथि आलोचना र विरोधहरू पनि सुनिन्छन्,’ ओलीले भनेका छन्, ‘कतिपय प्रश्नमा आत्मालोचना गर्ने र सुधार्ने पनि गरेका छौं । प्रश्न छलेर आफूलाई राम्रो देखाउने राजनीति हामीले गरेनौं ।’ उनले नागरिकभन्दा टाढा बसेर अनुहार छुपाउने काम नगरेको बताएका छन् । 

‘उम्मेदवारहरूले एकै ठाउँमा बसेर सार्वजनिक प्रश्नहरूको आमनेसामने जवाफ दिनु लोकतन्त्रको पारदर्शिता हो । चुनाव नागरिकले प्रतिनिधिलाई विश्वास सुम्पिने पर्व हो,’ ओलीले भनेका छन्, ‘उम्मेदवारहरू नागरिक भन्दा टाढा रहने, वास्तविक अनुहार छुपाउने र सुटिङ गरेर तयार गरिएका सामग्री मतदातासम्म पुर्‍याएर चुनाव अवधिभर झुक्याउने परिपाटीबाट नागरिक ठगिनु हुँदैन ।’ उनले सार्वजनिक बहस आयोजना गर्नेलाई पनि धन्यवाद दिँदै भनेका छन्, ‘म नागरिकको साथमा रहनेछु ।’