विराटनगर : मोरङको सुन्दरहरैँचा नगरपालिका–१० स्थित सुकुना माध्यमिक विद्यालय (सुकुना मावि)मा अध्ययनरत छात्रामाथि दुव्र्यवहार गरेको आरोपमा विद्यालयका दुई शिक्षक र एक जना सवारी चालकलाई प्रहरीले पक्राउ गरी अनुसन्धान थालेको छ ।
घटनापछि विद्यालयमा विद्यार्थी र अभिभावक आक्रोशित बनेका छन् । सुन्दरहरैँचा नगरपालिकाले आरोपितहरूलाई तत्काल निलम्बन गरेर कानुनी प्रक्रिया अघि बढाउन विद्यालयलाई निर्देशन दिएको छ । मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार पक्राउ पर्नेमा सुन्दरहरैँचा–१० का ४० वर्षीय प्रदीप भट्टराई, सुन्दरहरैँचा–२ का ३० वर्षीय किशोरलाल गच्छदार र सुन्दरहरैँचा–१२ का ३५ वर्षीय अबिरल मास्के रहेका छन् ।
भट्टराई विद्यालयका सवारी चालक तथा गच्छदार र मास्के शिक्षकका रूपमा कार्यरत रहेको प्रहरीले जनाएको छ । प्रहरीका अनुसार उनीहरूलाई सोमबार बिहान करिब १० बजेचिर नियन्त्रणमा लिएर अनुसन्धान अघि बढाइएको हो ।
विद्यालयका केही छात्रालाई मोबाइलमार्फत व्यक्तिगत सन्देश पठाउने,परीक्षामा उत्तीर्ण गराइदिने आश्वासन दिने तथा अमर्यादित व्यवहार गरेको भन्ने सूचना प्राप्त भएपछि अनुसन्धान सुरु गरिएको डीएसपी मिश्रले बताए ।
छात्राहरूमाथि यौनजन्य दुव्र्यवहारसमेत भएको हुनसक्ने आशंकालाई आधार बनाएर अनुसन्धानको दायरा थप विस्तार गरिएको प्रहरीले जनाएको छ । डीएसपी मिश्रले घटनाको वास्तविक प्रकृति, संलग्न व्यक्तिको भूमिका र आरोपको सत्यताको निष्कर्ष अनुसन्धान पूरा भएपछि मात्रै आउने बताए ।
अनुसन्धानका क्रममा अन्य व्यक्तिको संलग्नता पुष्टि भए उनीहरूमाथि पनि प्रचलित कानुनबमोजिम कारबाही गरिने उनले स्पष्ट पारे । घटनाका बारेमा सामाजिक सञ्जालमा विभिन्न टिप्पणी र सूचना सार्वजनिक भइरहेका बेला प्रहरीले अपुष्ट तथा भ्रामक सामग्री नफैलाउन सबैसँग आग्रह गरेको छ । अनुसन्धानलाई प्रभाव पार्ने गतिविधि नगरी सत्य तथ्य बाहिर ल्याउन सहयोग गर्न पनि प्रहरीले अनुरोध गरेको छ । यता, घटनाप्रति सुन्दरहरैँचा नगरपालिकाले गम्भीर चासो व्यक्त गरेको छ । नगरपालिकाका प्रमुख प्रशासकीय अधिकृत गणेशराज कार्कीले सुकुना माध्यमिक विद्यालयलाई पत्राचार गर्दै आरोपित शिक्षक तथा कर्मचारीलाई तत्काल निलम्बन गरी आवश्यक छानबिन र कानुनी प्रक्रिया अघि बढाउन निर्देशन दिएका छन् ।
नगरपालिकाले सञ्चारमाध्यम तथा सामाजिक सञ्जालमार्फत सार्वजनिक भएका आरोपलाई गम्भीर र खेदजनक घटनाका रूपमा उल्लेख गर्दै विद्यालय व्यवस्थापनलाई निष्पक्ष छानबिन गर्न, दोषी देखिएकामाथि कानुनी कारबाहीका लागि सम्बन्धित निकायमा सिफारिस गर्न तथा गरिएको कारबाहीको विवरण नगरपालिकामा पठाउन पनि भनेको छ ।
घटनापछि विद्यालयमा तनावपूर्ण अवस्था सिर्जना भएको छ । विद्यार्थीहरूले विरोध प्रदर्शनको तयारी गरेका थिए भने अभिभावकहरू पनि दोषीमाथि कडा कानुनी कारबाही हुनुपर्ने माग गर्दै आक्रोशित बनेका छन् । प्रहरीले घटनाको प्रत्येक पक्षको सूक्ष्म अनुसन्धान भइरहेको जनाउँदै प्रमाण,तथ्य र अनुसन्धानबाट दोषी ठहरिने जोकोहीलाई कानुनबमोजिम कारबाही गरिने जनाएको छ ।
प्रतिक्रिया दिनुहोस !
