हुलास स्टिलसहित दुई उद्योगले तिरेनन् जरिवाना, नन्दनले बुझायो

सिमरा : वातावरण प्रदूषण गरेको भन्दै बाराको जीतपुरसिमरा उपमहानगरपालिकाद्धारा कारवाही गरिएका हुलास स्टिलसहित तीन ठूला उद्योगमध्ये एउटाले मात्रै सोमबार जरिवाना बुझाएको छ । जीतपुरसिमरा–३ स्थित नन्दन घि एण्ड आयल इण्डष्ट्रिजले दुई लाख ५० हजार जरिवाना बुझाएको हो । 

उद्योग प्रशासनले सोमबार उपमहानगरपालिकाको नेपाल बैंकस्थित राजश्व खातामा जरिवाना रकम दाखिला गरेको वातावरण शाखा प्रमुख इन्जिनियर पुष्पा सिंहले जानकारी दिएकी छिन् । नन्दनले जरिवाना तिर्दा जीतपुरसिमरा–१ स्थित हुलास स्टिल इण्डष्ट्रिज र जीतपुरसिमरा–३ स्थित गणपति वनस्पति लिमिटेडले भने आलटाल गरेको छ । 

सात दिनको समय दिएर उपमहानगरपालिकाले हुलास स्टिललाई पाँच लाख र असार २९ गते नन्दन तथा गणपति उद्योगलाई समान दुई लाख ५० हजार जरिवाना गरेको थियो । तोकिएको समयभित्र एक उद्योगले मात्रै जरिवाना तिर्दा अन्य दुई उद्योगले भने अटेर गरेको इन्जिनियर सिंहले बताइन् । 

उपमहानगरपालिकाबाट गठित वातावरणीय अनुगमन समितिको स्थलगत निरीक्षण, नगर प्रहरीको प्रतिवेदन र वातावरणीय कारवाही सिफारिसका आधारमा तीन उद्योगहरूलाई कारबाही गरिएको थियो ।

अनुगमनका क्रममा उद्योगहरूले फोहोर, तेलजन्य पदार्थ तथा लेदो आसपासका क्षेत्रमा फालेको, फोहोर पानीको उचित व्यवस्थापन नगरेको, कार्यस्थलमा सुरक्षा मापदण्ड पालना नगरेको र स्वीकृत वातावरणीय अध्ययन प्रतिवेदन तथा कानुनको उल्लंघन गरेको पाइएको सिंहले जानकारी दिएकी छिन् । 

उपमहानगरपालिकाले वातावरण संरक्षण ऐन २०७६ तथा वातावरण संरक्षण नियमावली २०७७ बमोजिम असार १५ गते स्पष्टिकरण माग गरेकोमा चित्तबुझ्दो जवाफ नआएपछि जरिवाना गर्ने निर्णय गरेको सिंहले बताइन् । ती उद्योगले जथाभावी फोहोर गरिरहेको भन्ने जनगुनासो बढेपछि उपमहानगरपालिकाले अनुगमन गरेर पहिलो पटक जरिवाना गरेको हो । 

जरिवाना तोकिएको उद्योगमध्ये हुलास स्टिलले उपमहानगरलाई पत्र लेख्दै स्पष्ट कारण र प्रमाण उपलब्ध गराउन माग गरेको छ । आफूहरुले प्रदूषण नगरेको र जरिवाना पनि नतिर्ने भन्दै हुलास स्टिलले उल्टै जरिवाना गराउने कारण र प्रमाण माग गरेको इन्जिनियर सिंहले बताइन् । 

‘अनुगमनका क्रममा उद्योगले वातावरणमा असर पुग्ने गरी प्रदूषण फैलाएको देखिएपछि कारवाही स्वरुप जरिवाना गरेका हौ’, सिंहले भनिन्, ‘उद्योग प्रशासन गल्ती स्वीकार गरेर जरिवाना तिर्ने भन्दा पनि प्रमाण मागेर आलटाल गर्न खोजिरहेको छ । हामी छलफल गरेर अर्को निर्णय गर्छौ ।’ अर्को उद्योग गणपति वनस्पति पनि सम्पर्कमा नआएको सिंहको भनाई छ । जरिवाना नतिर्ने दुबै उद्योग र प्रदूषण नियन्त्रणमा मौन देखिने अन्य उद्योगलाई पनि कारवाहीको दायरा ल्याइने सिंहले बताइन् ।