जाजरकोट : जाजरकोटका एक पुरुषको शव सुर्खेतस्थित भेरी नदी किनारमा भेटिएको छ । जाजरकोटको जुनिचाँदे गाउँपालिका–१ बस्ने वर्ष ४५ का कर्णबहादुर रावतको शव सुर्खेतको गुर्भाकोट नगरपालिका–११ बर्माघाटस्थित भेरी नदी किनारमा भेटिएको प्रहरीले जानकारी दिएको छ ।
जिल्ला प्रहरी कार्यालय सुर्खेतका प्रवक्ता कविन्द्रसिं बोहोराका अनुसार सोमबार बेलुका स्थानीयले टेलिफोनमार्फत जानकारी गराएपछि प्रहरी चौकी मेहलकुनाबाट प्रहरी नायव निरीक्षक मनिष गुरुङको कमान्डमा प्रहरी टोली घटनास्थल खटिएको थियो ।
शव पोस्टमार्टमका लागि मेहलकुना अस्पतालको शवगृहमा राखिएको थियो । मंगलबार मृतकका छोरा गणेश रावतले बुबाको सनाखत गरी शव बुझेका छन् । कर्णबहादुर असार २५ गते आफ्नै घर नजिक बाख्रा चराउन गएका बेला भीरबाट लडी खोलामा परेको र खोलाले बगाएर बेपत्ता गराएको थियो । खोलाले बगाउँदै भेरीमा पुर्याएको प्रहरीले जनाएको छ ।
प्रतिक्रिया दिनुहोस !
