भारतीय विद्यार्थी फिनल्यान्डमा बेपत्ता, दुई महिनापछि समुद्रमा भेटियो शव
असार २८, २०८३ आइतबार १६:५५:१४
फिनल्यान्ड : फिनल्यान्डको राजधानी हेलसिन्कीस्थित समुद्री क्षेत्रमा भारत हैदराबादका १८ वर्षीय विद्यार्थी मणिदीप रेड्डी गुज्जाको शव फेला परेको छ । गत ५ मेदेखि बेपत्ता रहेका मणिदीपको शव करिब दुई महिनापछि भेटिएको परिवारका कानुनी प्रतिनिधि केएलबी कुमारले आइतबार पुष्टि गरेका छन् ।
परिवारका तर्फबाट वकिल कुमारले घटनाको अनुसन्धानमाथि प्रश्न उठाउँदै यो मृत्यु शंकास्पद भएको दाबी गरेका छन् । दुई महिनासम्म शव नभेटिनु र अनुसन्धान प्रभावकारी ढंगले अघि नबढ्नुले धेरै आशंका उत्पन्न गरेको उनले बताएका छन् । परिवारले घटनाको निष्पक्ष र पारदर्शी छानबिनको माग गरेको छ ।
भारतीय दूतावासले परिवारलाई दियो जानकारी
लाहटी क्याम्पसमा पढ्दै थिए इन्जिनियरिङ
मणिदीप फिनल्यान्डको लापेनरान्टा–लाहटी युनिभर्सिटी अफ टेक्नोलोजीको लाहटी क्याम्पसमा इन्जिनियरिङ स्नातक प्रथम वर्षमा अध्ययनरत थिए । उनी लाहटी शहरको रितानीमेनकाटू क्षेत्रमा बस्दै आएका थिए । परिवारका अनुसार उनी सन् २०२५ मा उच्च शिक्षाका लागि फिनल्यान्ड गएका थिए । आमा ममता रेड्डीका अनुसार ५ मेमा मणिदीपले फोन गरेर ५ हजार रुपैयाँ मागेका थिए । उनले तुरुन्तै रकम उनको खातामा पठाइदिइन् । तर त्यसको केही घण्टापछि उनी सम्पर्कविहीन भएका थिए ।
हेलसिन्की पुगेपछि सम्पर्कविहीन
फिनिस प्रहरीको प्रारम्भिक अनुसन्धानअनुसार मणिदीपले करिब २,५०० रुपैयाँ खर्च गरेर लाहटीबाट करिब १०० किलोमिटर टाढा रहेको हेलसिन्कीसम्म बस यात्रा गरेका थिए । हेलसिन्की पुगेपछि उनी एउटा लोकप्रिय रेस्टुरेन्टमा खाना खाएको र एक सपिङ मलमा घुमिरहेको सीसीटीभी फुटेजमा देखिएको थियो । अन्तिम पटक उनलाई सपिङ सेन्टरतर्फ जाने बाटोमा हिँडिरहेको अवस्थामा देखिएको थियो । त्यसपछि उनको मोबाइल फोन बन्द भयो र उनीसँग कुनै सम्पर्क हुन सकेन ।
परिवारका अनेक प्रश्न
घटनापछि मणिदीपका बुबा–आमाले लगातार प्रश्न उठाइरहेका छन्–उनी अचानक लाहटीबाट हेलसिन्की किन गए ? उनीमाथि कुनै दबाब थियो ? कसैसँग दुश्मनी थियो ? वा अन्य कुनै कारण थियो ? आमा ममता भनिन्, ‘हामीलाई छोरालाई वास्तवमा के भयो भन्ने थाहा छैन । उसले केवल सानो रकम मागेको थियो, त्यसपछि अचानक बेपत्ता भयो ।’
प्रतिक्रिया दिनुहोस !
