बिरामी बोक्ने एम्बुलेन्सबाट ठूलो परिमाणमा गाँजा तस्करी, चालक फरार

सुनसरी : बिरामी बोक्न प्रयोग हुने अत्यावश्यक सवारी साधन एम्बुलेन्समार्फत तस्करी गरिएको  ठूलो परिमाणमा प्रतिबन्धित लागू औषध गाँजा  बरामद गरिएको छ । प्रहरीले सुनसरीको धरानबाट ४४० किलो गाँजासहित एउटा एम्बुलेन्स नियन्त्रणमा लिइएको सुनसरीका प्रहरी प्रमुख एसपी केशबकुमार थेबेले बताएका छन् ।

उनका अनुसार मंगलबार बिहान १२ः४० बजे इलाका प्रहरी कार्यालय धरानबाट खटिएको प्रहरी टोलीले धरान उपमहानगरपालिका–१३ स्थित धरान–धनकुटा सडक  क्षेत्रमा सडक छेउमा रोकिराखिएको को १ च ७३५९ नम्बरको एम्बुलेन्समाथि शंका लागेर चेकजाँच गरेको थियो । चेकजाँचका क्रममा एम्बुलेन्सभित्र लुकाइछिपाइ राखिएको अवस्थामा लागूऔषध गाँजा ४४० किलो बरामद गरिएको एसपी थेबेले बताए ।

उक्त एम्बुलेन्स धरान–१८ स्थित बुढासुब्बा डाइग्नोष्टिक सेन्टर प्रालिद्वारा सञ्चालन हुँदै आएको खुलेको छ । बरामद गरिएको गाँजा र एम्बुलेन्सलाई नियन्त्रणमा लिएर इलाका प्रहरी कार्यालय धरानमा राखी थप अनुसन्धान भइरहेको एसपी थेबेले बताए । उनले एम्बुलेन्स चालक फरार रहेको बताएका छन् । उनका अनुसार चालकको पहिचान भइसकेको र पक्राउका लागि प्रहरी टोली परिचालन गरिएको छ ।

‘एम्बुलेन्स जस्तो संवेदनशील र अत्यावश्यक सेवामा प्रयोग हुने सवारी साधनलाई लागूऔषध ओसारपसारमा प्रयोग गरिएको विषय गम्भीर छ’, एसपी थेबेले भने, ‘घटनाको सबै पक्षबाट अनुसन्धान भइरहेको छ ।’ प्रहरीका अनुसार पछिल्लो समय धनकुटा जिल्लाको विभिन्न क्षेत्रमा उत्पादन हुने गाँजा मुलघाट, भेडेटार हुँदै धरान तथा तराईका विभिन्न क्षेत्रतर्फ तस्करी हुने क्रम बढ्दो छ । विशेष गरी रातिको समयमा एम्बुलेन्स, तरकारी बोक्ने गाडी तथा अन्य शंकास्पद सवारी साधन प्रयोग गरेर गाँजा ओसारपसार भइरहेको सूचनाका आधारमा निगरानी बढाइएको एसपी थेबेले बताए ।