रसुवा : वर्षातका कारण बेत्रावती -मैलुङ्ग-स्याफ्रुवेसी अन्तर्राष्ट्रिय नाका रसुवागढी जोड्ने सडक अवरुद्ध भएको छ । नियमित परेको अविरल वर्षा र चीन तर्फबाट बहने भोटेकोसी र लेन्देखोलामा आएको बाढीले सडक कटान गरेपछि मैलुङ-स्याफ्रुबेसी सडकखण्ड पूर्णरूपमा अवरुद्ध भएको हो ।
जिल्ला आपतकालीन कार्य सञ्चालन केन्द्र रसुवाका अनुसार उत्तरगया गाउँपालिका १ मैलुङ्गदेखि वडा नं ५ खाल्टे क्षेत्र र कालिका गाउँपालिका–१ गुम्चेतस्थित गल्छी–त्रिशुली–स्याफ्रुबेसी–रसुवागढी सडकखण्डमा त्रिशूली नदीको बाढीले सडक कटान ढुङ्गा,लेदो र माटोसहितको पहिरो खसेपछि सडक अवरुद्ध भएको हो ।
अन्तर्राष्ट्रिय नाका रसुवागढी जाने छोटो मार्ग भएपनि दायाँबायाँ भिरालो पाखो रहेकाले जतिबेला पनि ढुङ्गा खस्ने कारण जोखिम हुनाले यो सडक वर्षातको समयमा बन्द हुने गर्दछ । लगातारको वर्षाले पहिरोको जोखिम बढेपछि अन्तर्राष्ट्रिय नाका जोड्ने बेत्रावती -मैलुङ्ग -स्याफ्रुबेसी सडक बन्द गरिएको प्रमुख जिल्ला अधिकारी नरेन्द्र परियारले बताए । सडक माथिबाट ढुङ्गा खस्ने जोखिम रहेकाले वर्षातको समयमा सडक बन्द गरिएको हो ।
प्रतिक्रिया दिनुहोस !
