विराटनगर : मोरङको रतुवामाई नगरपालिका–४ भद्रचोकस्थित हुलाकी सडकमा बिहीबार राति मोटरसाइकल दुर्घटना हुँदा एक जना युवकको मृत्यु भएको छ ।
प्रहरीको प्रारम्भिक अनुसन्धानबाट मादक पदार्थ सेवन (मापसे) गरेर मोटरसाइकल चलाएका कारण दुर्घटना भएको पत्ता लागेको छ । विराटनगरबाट झापाको गौरीगन्जतर्फ जाँदै गरेको बा ७३ प ४२१६ नम्बरको मोटरसाइकल राति करिब १०ः३५ बजे आफैं अनियन्त्रित भएर दुर्घटनामा परेको मोरङ ट्राफिक प्रहरी प्रमुख इन्स्पेक्टर सन्तोष न्यौपानेले जानकारी दिए ।
दुर्घटनामा मोटरसाइकल चालक झापाको गौरीगन्ज गाउँपालिका–६ आठमोजाका २८ वर्षीय वरुणकुमार राजवंशी गम्भीर घाइते भएका थिए । उनलाई तत्काल उपचारका लागि रतुवामाई नगर अस्पताल झुर्किया लगिए पनि चिकित्सकले मृत घोषणा गरिदिएको न्यौपानेले बताए ।
प्रहरीले कानुनी प्रक्रिया पूरा गरी शवलाई पोस्टमार्टमका लागि रंगेली अस्पताल पठाएको छ। घटनाका बारेमा इलाका प्रहरी कार्यालय सिजुवाका इन्स्पेक्टर कैलाश लिम्बू नेतृत्वको टोलीले थप अनुसन्धान गरिरहेको छ ।
प्रहरीले मादक पदार्थ सेवन गरेर सवारी चलाउँदा दुर्घटनाको जोखिम अत्यधिक हुने भएकाले त्यस्तो कार्य नगर्न सबै चालकलाई आग्रह गरेको छ । प्रहरीका अनुसार मापसेका कारण हुने दुर्घटनाले मानवीयसँगै भौतिक क्षति पनि निम्त्याउने गरेको छ ।
प्रतिक्रिया दिनुहोस !
