विराटनगर : आपराधिक राज चलाइरहेका विवादास्पद छविका गुन्डा नाइके अभिषेक गिरी पक्राउ परेका छन् । शनिबार बिहान गिरीको विराटनगर मधुमारास्थित घरमा छापा मारेको प्रहरीले घरबाटै उनलाई नियन्त्रणमा लिएको हो ।
घरमा अवैध हतियार लुकाएर राखेको आशंकामा पुगेको प्रहरीले जिल्ला कारागार मोरङका कैदीबन्दीसँग रकम असुल गरेको आरोपमा गिरीलाई पक्राउ गरेको हो । कारगारलाई आफ्नो नियन्त्रणमा लिएर कैदीबन्दीमाथि असुली धन्दा चलाइरहेका थिए । पैसा बुझाउन नसक्नेलाई कारागारभित्रै चरम यातना दिने गरिएको थियो ।
अपहरण तथा शरीर बन्धक मुद्दामा मोरङ कारागारमा रहँदा गिरी चौकीदार थिए । कैद भुक्तान गरी छुटे पनि उनीमाथि मोरङ कारागारको आन्तरिक व्यवस्थापनमा सक्रिय भएको आरोप लाग्दै आएको थियो । मोरङका प्रहरी प्रमुख एसपी कवित कटवालले कैदीबन्दीको भत्ता दुरुपयोग आरोपमा गिरीलाई पक्राउ गरिएको बताए । ‘कारागारका कैदीबन्दीलाई प्राप्त हुने पैसा उनले लगेको आरोप छ,’ उनले भने, ‘थप अनुसन्धान जारी छ ।’
विवादास्पद छविका गिरी गुन्डा नाइकेको रुपमा परिचित छन् । पछिल्लो दुई वर्षयता भने उनी नेपाली कांग्रेसको राजनीतिमा सक्रिय छन् । कांग्रेसको संरक्षणमा गिरीले विराटनगरमा आतंक मच्चाइरहेका थिए ।
प्रतिक्रिया दिनुहोस !
