भ्रष्टाचारीलाई कारवाही गरेर स्वीस बैंकदेखिका पैसा नेपाल ल्याउनु पर्छ : सांसद भट्टराई
असार ५, २०८३ शुक्रबार १३:५४:५
काठमाडौं : सत्तारुढ राष्ट्रिय स्वतन्त्र पार्टी (रास्वपा) का सांसद हरिमोहन भट्टराईले डा. स्वर्णिम वाग्लेले आउँदो वर्ष राष्ट्रिय ऋण कम उठाउने वाचा आफूहरुलाई दिनुपर्ने बताएका छन् । शुक्रबारको प्रतिनिधिसभा बैठकमा राष्ट्रिय ऋण उठाउने विधेयकमाथिको छलफलमा बोल्दै सांसद भट्टराईले डा. स्वर्णिम वाग्ले आउँदा पनि ऋणै उठाउनु पर्छ र भन्ने आफूलाई लाग्ने गरेको बताउँदै विगतदेखिका समस्याका कारण यो अवस्था रहेको बताएका छन् ।
सांसद भट्टराईले विगतमा पानीजहाज ल्याउने, अफिस खोल्ने अन्तर्राष्ट्रिय विमानस्थल बनाउने जहाज नचल्ने, भ्रष्टाचार हुनेलगायतले राष्ट्रिय ऋणको बोझ बढाएको बताए । उनले यस्ता क्षेत्रमा राष्ट्रिय ऋण जानु नहुने बताउँदै कुन क्षेत्रमा जाने हो त्यो सदनलाई पनि जानकारी हुनुपर्ने बताए । कृषि, जलविद्युत, पर्यटनलगायत धेरै सम्भावना भएका क्षेत्र छाडेर अन्यत्र लगानी गएर भ्रष्टाचार भएको समेत उनले बताएका छन् ।
सांसद भट्टराईले अर्को वर्षसम्म भ्रष्टाचारीलाई कारवाही गरेर यो ऋणको बोझ हटाउनु पर्ने समेत बताएका छन् । उनले देशको भविष्य डा. स्वर्णिम वाग्लेको हातमा रहेको बताउँदै सांसद भट्टराईले आफूहरुले धेरै आशा गरेको र गर्व लाग्ने गरेको बताएका छन् । उनले यति कम राजश्व उठिरहेका बेला कहिलेकाही अर्थमन्त्रीले कसरी अर्थतन्त्र चलाउनु होला जस्तो समेत आफूलाई लाग्ने गरेको बताए ।
सांसद भट्टराईले अर्थमन्त्रीका कुरा सुन्दा अचम्म लाग्ने गरेको बताउँदै उनले खटाई र बोलाई सुन्दा गरिहाल्नु हुन्छ जस्तो लाग्ने समेत बताए । उनले अब यो देश बनाउनु पर्ने बताउँदै अर्थमन्त्रीको काँधमा धेरै ठूलो जिम्मेवारी रहेको बताए । सांसद भट्टराईले भ्रष्टाचारलाई कारवाही गरेर स्वीस बैंकदेखिका दुई–चार खर्ब पैसा नेपाल ल्याउनु पर्ने बताए ।
प्रतिक्रिया दिनुहोस !
