विराटनगर : मोरङ उर्लाबारीबाट दुई युवक खैरो हेरोइन (ब्राउन सुगर)लाई मलद्वारमा लुकाएको अवस्थामा पक्राउ परेका छन्। उर्लाबारी नगरपालिका–७ गोलचोकबाट प्रहरी टोलीले उर्लाबारी–६ का २९ वर्षीय केशव श्रेष्ठ र उर्लाबारी–५ का २४ वर्षीय निश्चल गुरुङलाई शनिबार साँझ नियन्त्रणमा लिएको हो ।
प्रदेश १–०२–०५० प १९६० नम्बरको मोटरसाइकलमा सवार उनीहरु शनिबार साँझ ६ बजेतिर शंकास्पद गतिविधि देखिएपछि रोकेर सोधपुछ गरिएको थियो । प्रारम्भिक बयानकै क्रममा दुवै जनाले शरीरभित्र लागुऔषध लुकाएको स्वीकार गरेका थिए । त्यसपछि उनीहरूलाई तत्काल मंगलबारेस्थित मदन भण्डारी अस्पताल एवं ट्रमा सेन्टर लगिएको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए ।
उनका अनुसार दुवै जनाले पारदर्शी कन्डमभित्र कालो प्लाष्टिकमा प्याक गरेर मलद्वारमा खैरो हेरोइन लुकाएको बताएका थिए । अस्पतालमा चिकित्सकीय निगरानीमा ‘दिसा गराउने औषधि’ सेवन गराइए पनि तत्काल दिसा नभएपछि उनीहरूलाई इलाका प्रहरी कार्यालय उर्लाबारी लगिएको थियो । आइतबार बिहान करिब ३ः३० बजेतिर प्रहरी हिरासतमै रहेका बेला दुवै जनाले दिसा गर्दा शरीरभित्र लुकाइएको शंकास्पद वस्तु बाहिर आएको प्रहरीले जनाएको छ ।
पारदर्शी कन्डमभित्र कालो पोलिथिनमा बेरिएको अवस्थामा खैरो हेरोइनजस्तो देखिने लिसाइलो पदार्थ फेला परेको जानकारी डीएसपी मिश्रले दिए । प्रहरीका अनुसार केशव श्रेष्ठको मलद्वारबाट प्लास्टिकसहित १८ ग्राम ९२० मिलिग्राम र प्लास्टिक हटाएपछि १४ ग्राम ७२० मिलिग्राम खैरो हेरोइन बरामद भएको छ । त्यसैगरी निश्चल गुरुङको शरीरबाट प्लास्टिकसहित ११ ग्राम तथा प्लास्टिकबाहेक ९ ग्राम ४०० मिलिग्राम खैरो हेरोइन फेला परेको प्रहरीले जनाएको छ ।
प्रहरीले लागुऔषध ओसारपसारमा प्रयोग गरिएको मोटरसाइकल र दुवै जनाको मोबाइलसमेत नियन्त्रणमा लिएको छ । मोबाइलका आधारमा थप अनुसन्धान गरेर लागुऔषध कारोबारमा संलग्न अन्य व्यक्तिहरूको पहिचान गर्ने तयारी भइरहेको प्रहरीले जनाएको छ । पक्राउ परेका श्रेष्ठ र गुरुङलाई इलाका प्रहरी कार्यालय उर्लाबारीको हिरासतमा राखिएको छ । उनीहरूमाथि थप अनुसन्धान गरिरहेको प्रहरीले जनाएको छ ।
प्रहरीका अनुसार उनीहरूमाथि लागुऔषध ऐनअन्तर्गत मुद्दा चलाउने तयारी भइरहेको छ । उर्लाबारी क्षेत्रमा पछिल्लो समय प्रहरीले लागुऔषध नियन्त्रणमा सक्रियता बढाएको छ । यसअघि पनि प्रहरीले उर्लाबारीमै छापा हानेर ठूलो परिमाणमा लागुऔषध बरामद गरेको थियो ।
मोरङ प्रहरी प्रमुख एसपी कवित कटवालले लागुऔषध ओसारपसारमा तस्करहरूले अत्यन्त जोखिमपूर्ण र गोप्य शैली अपनाउन थालेको बताए । उनका अनुसार शरीरभित्र विशेषगरी मलद्वारमा लागुऔषध लुकाएर ओसारपसार गर्नु स्वास्थ्यका दृष्टिले पनि निकै खतरनाक हो । ‘यसरी शरीरभित्र लागुऔषध लुकाउँदा कुनै कारणले प्याकेट फुटेमा ज्यानै जान सक्ने अवस्था आउन सक्छ,’ एसपी कटवालले भने, ‘समयमै चिकित्सकीय निगरानीमा प्रक्रिया अघि बढाइएकाले दुवै जनाको ज्यान जोगिएको हो ।’
प्रतिक्रिया दिनुहोस !
