भारत : भारतको उत्तर–पूर्वी राज्य मणिपुरमा फेरि हिंसात्मक घटना भएको छ । राज्यको काङपोकपी जिल्लामा भएको आक्रमणमा तीन जनाको मृत्यु भएको छ ।
काङपोकपी प्रहरी थानाका प्रभारी मिन किपगेनका अनुसार शुक्रबार बिहान करिब ४ बजे हतियारधारी संदिग्ध उग्रवादीहरूले लोइबोल खुलेन गाउँमा अन्धाधुन्ध गोली प्रहार गरेका थिए, जसमा तीन जनाको ज्यान गएको हो । उनले बताएअनुसार आक्रमणकारीहरूले केही घरमा आगजनी समेत गरेका थिए । हाल प्रहरीले आसपासका क्षेत्रमा आक्रमणकारीहरूको खोजी अभियान सञ्चालन गरिरहेको छ ।
प्रहरीले मृतकहरूको पहिचान लेटखोङगम हाओकिप, उनकी पत्नी टिनमेरी हाओकिप र जाङमिनलाल हाओकिपका रूपमा गरेको छ । उनीहरू सबै लोइबोल खुलेन गाउँका बासिन्दा थिए । यसबीच कुकी–जो समुदायको प्रतिनिधित्व गर्ने शीर्ष संस्था कुकी इनपी मणिपुरले घटनाको निन्दा गर्दै नगा उग्रवादी संगठन एनएससीएन आइएम र त्यससँग सम्बन्धित भनिएको जेडयूएफ (के) समूहलाई जिम्मेवार ठहराएको छ ।
संस्थाले जारी गरेको विज्ञप्तिमा निहत्था नागरिकमाथिको यो हमला ‘बर्बर आक्रमण’ भएको बताउँदै निर्दोष गाउँलेहरूको हत्या तथा उनीहरूको घर र जीविकोपार्जन नष्ट गर्नु मानवीय गरिमा र आधारभूत मानवअधिकारमाथिको गम्भीर उल्लंघन भएको जनाएको छ । कुकी इनपीले केन्द्र सरकारसँग घटनाको तत्काल छानबिन गर्न, दोषीहरूलाई पक्राउ गरी पीडितहरूलाई न्याय दिलाउन माग गरेको छ ।
मणिपुरमा पछिल्ला तीन वर्षदेखि जातीय तनाव र हिंसा जारी छ । सुरुमा कुकी जनजाति र मैतेई समुदायबीच हिंसा भएको थियो भने यस वर्ष फेब्रुअरीदेखि कुकी र मणिपुरमा बसोबास गर्ने नगा समुदायबीच पनि नयाँ तनाव र हिंसाका घटनाहरू देखिन थालेका छन् । यस पछिल्लो घटनाबारे कुकी समुदायका विभिन्न नागरिक संगठनहरूले नगा उग्रवादी समूहहरूलाई दोष दिएका छन् । तर हालसम्म ती समूहहरूको तर्फबाट आरोपबारे कुनै प्रतिक्रिया आएको छैन ।
प्रतिक्रिया दिनुहोस !
