डडेलधुरा : डडेलधुरामा समानुपातिकतर्फ राष्ट्रिय स्वतन्त्र पार्टी (रास्वपा) पहिलो दल बनेको छ। रास्वपाले अन्य दलहरूलाई पछ्याई प्रत्यक्षभन्दा केही बढी मत ल्याएको हो। २१ गते सम्पन्न प्रतिनिधिसभा निर्वाचनको प्रत्यक्ष तर्फबाट सबैभन्दा बढी मत ल्याई विजयी हासिल गरेको रास्वपाले समानुपातिकतर्फ पनि पहिलो दल बनेको हो।
यसअघिका ७ वटा निर्वाचन जितेको नेपाली कांग्रेस अहिले भने अपराजित यात्रा भोग्नु परेको छ। प्रत्यक्ष निर्वाचनमा हार व्यहोरेको कांग्रेसले समानुपातिक मत पनि दोस्रो नै रहेको छ। यस अघिका सात वटै निर्वाचनमा नेपाली कांग्रेसका पूर्वसभापति शेरबहादुर देउवा उम्मेदवार रहेका थिए। तर यस पटक भने देउवा मतदान गर्न पनि डडेलधुरा नआउँदा हार व्यहोर्नु परेको कांग्रेसका शुभचिन्तकको भनाइ छ।
मुख्य निर्वाचन अधिकृतको कार्यालयले सार्वजनिक गरेको अन्तिम मत परिणामअनुसार रास्वपाले १२ हजार २६८ मत प्राप्त गर्दै जिल्लामा सबैभन्दा बढी मत प्राप्त गरेको छ। समानुपातिकतर्फ नेपाली कांग्रेसले ११ हजार ८ सय ५१ मत पाउँदा नेपाली कम्युनिस्ट पार्टीले ५ हजार ७ सय ७२, नेकपा (एमाले)ले ३ हजार २ सय ७५ र राष्ट्रिय प्रजातन्त्र पार्टीले २ हजार ३९२ मत प्राप्त गरेको जनाएको छ।
मुख्य निर्वाचन अधिकृत अरुण कुमार कोइरालाका अनुसार जिल्लामा समानुपातिकतर्फ कुल ४६ हजार २११ मत खसेको थियो। त्यसमध्ये ४४ हजार १८६ मत सदर भएका थिए भने २ हजार २५ मत बदर भएका छन्। यसअघि प्रत्यक्षतर्फ पनि डडेलधुराबाट राष्ट्रिय स्वतन्त्र पार्टीका उम्मेदवार डा. ताराप्रसाद जोशी विजयी भएका थिए। उनले १९ हजार १३१ मत प्राप्त गर्दै जित हासिल गरेका हुन्। उनका निकटतम प्रतिस्पर्धी नेपाली कांग्रेसका नैनसिंह महरले १२ हजार १२१ मत प्राप्त गरेका थिए। जोशीसँग महर ७ हजार १० मतान्तरले पराजित भएका थिए।
यसैगरी नेकपा एमालेका उम्मेदवार चक्र स्नेहीले दुई हजार ३१६ मत प्राप्त गर्दा नेपाली कम्युनिस्ट पार्टीका उम्मेदवार मानसिंह मालले ६ हजार ४३८ मत प्राप्त गरेका थिए। मुख्य निर्वाचन अधिकृत अरुण कुमार कोइरालाका अनुसार डडेलधुरामा प्रत्यक्षतर्फ जम्मा ४५ हजार ९०९ मत खसेको थियो।
डडेलधुरामा १० उम्मेदवारको जमानत जफत
प्रतिनिधिसभा सदस्य निर्वाचन अन्तर्गत डडेलधुरामा नेकपा (एमाले)का उम्मेदवार सहित १० जनाको धरौटी रकम जफत भएको छ। एमालेका उम्मेदवार चक्रप्रसाद स्नेहीसहित १० जना उम्मेदवारको जमानत जफत भएको हो। प्रतिनिधिसभा सदस्य निर्वाचन ऐन, २०७४ को दफा ७१ (१) अनुसार पहिलो हुने निर्वाचित हुने प्रणालीअन्तर्गत कुल सदर मतको १० प्रतिशतभन्दा कम मत प्राप्त गर्ने उम्मेदवारको धरौटी जफत हुने व्यवस्था छ।
डडेलधुरामा कुल ४३ हजार ६७ मत सदर भएकाले जमानत जोगाउन उम्मेदवारले कम्तीमा ४ हजार ३ सय ७ मत ल्याउनुपर्ने हुन्छ। तर एमालेका स्नेहीले भने २ हजार ९२६ मत मात्रै प्राप्त गरेपछि उनको जमानत जफत भएको हो।
जमानत जफत हुने अन्य उम्मेदवारमा राष्ट्रिय प्रजातन्त्र पार्टी (राप्रपा)का गोविन्द खडायत, आम जनता पार्टीका खडकबहादुर ठकुराठी, राष्ट्रिय जनमोर्चाका चन्द्रदेव विक, नेपाल मजदुर किसान पार्टीका सुरेन्द्रराज भट्ट, जयमातृभूमि पार्टीका लक्ष्मीदत्त भट्ट र श्रम संस्कृति पार्टीका महेन्द्र पुनमगर रहेका छन्। भने यस्तै स्वतन्त्र उम्मेदवार गोरखबहादुर ऐर, सुरेन्द्र रावल र तीर्थराज उप्रेतीको पनि जमानत जफत भएको छ।
प्रतिक्रिया दिनुहोस !
