निजामती कर्मचारी अस्पतालका आन्दोलनरत कर्मचारीसँग ६ बुँदे सहमति

काठमाडौं : निजामती कर्मचारी अस्पतालका कर्मचारी र अस्पताल प्रशासनबीच ६ बुँदे सहमति भएको छ। संघीय मामिला तथा सामान्य प्रशासन मन्त्रालयको पहलमा दुई पक्षबीच सहमति भएको हो। 

जसअनुसार निजामती कर्मचारी अस्पताल (कर्मचारीहरूको सेवाका शर्त र सुविधा) विनियमावली र निजामती कर्मचारी अस्पतालको संगठन तथा व्यवस्थापन सर्वेक्षणमा आवश्यक संशोधन तथा परिमार्जन प्रक्रिया एक महिनाभित्र पेस गर्ने र सो क्रममा चिकित्सक, कर्मचारी युनियन लगायतको प्रतिनिधि समेत सहभागी गराउने सहमति भएको छ। 

त्यस्तै अस्पतालको समग्र गुणस्तर, वित्तियस्थिति, जनशक्ति योजना, कर्मचारीको हित र उत्प्रेरणासमेतलाई मध्यनजर गरी अस्पताल व्यवस्थापन चिकित्सक र कर्मचारी सम्मिलित समितिको प्रतिवेदनको आधारमा करारमा कार्यरत (परिक्षामा सहभागी नहुनेसमेत) स्वीकृत करार कार्यविधिबमोजिम हालः चिकित्सक/कर्मचारी प्राथमिकता दिई सेवाको सुनिश्चितता गर्न निजामती कर्मचारी अस्पताल विकास समितिमा पेस गर्ने, अस्पतालको समग्र गुणस्तर सुधारको लागि सम्बद्ध सरोकारवालाहरूको सहभागितामा क्वालिटी सर्कल बनाई कार्यान्वयन गर्ने, ज्यालादारी/सेसनमा कार्यरत कर्मचारीको सम्बन्धमा कार्यरत कर्मचारीलाई प्राथमिकतामा राखी स्वीकृत करार कार्यविधि, २०७८ अनुसार स्वीकृत दरबन्दीमा पदपूर्ति प्रक्रिया अगाडि बढाउने सहमति भएको छ।

त्यस्तै निजामती कर्मचारी अस्पतालको समग्र गुणस्तर, सेवाप्रवाहमा सुधार र सेवाप्रवाहमा निरन्तरता दिने एवं निजामती कमर्चारीमैत्री अस्पतालमा रुपान्तरण गर्न ऐक्यबद्धता जारी गर्ने र निजामती कर्मचारी अस्पतालमा हालः भइरहेको अनसन, तालाबन्दी, व्यानरलगायतका आन्दोलनका सबै कार्यक्रम फिर्ता गर्ने सहमति पत्रमा उल्लेख छ।