सरकार र सीजेपीबीच भएन सहमति, धर्मेन्द्र प्रधानको राजीनामामा अड्कियो वार्ता

भारत : निट प्रश्नपत्र चुहावट प्रकरणमा विगत तीन सातादेखि प्रदर्शन गरिरहेको कक्रोेच जनता पार्टी (सीजेपी) र सरकारबीच आज भएको दोस्रो चरणको वार्ता पनि निष्कर्षविहीन भएको छ । यद्यपि सीजेपीले सरकार आफ्ना तीनमध्ये दुई मागमा सकारात्मक भएको दाबी गरेको छ । तर केन्द्रीय शिक्षामन्त्री धर्मेन्द्र प्रधानको राजीनामाको मागमा भने सहमति हुन सकेको छैन ।

यस विषयमा सरकारले भोलिसम्म समय मागेको बताइएको छ । अब भोलि दिउँसो करिब १२ बजे सरकार र सीजेपीबीच पुनः वार्ता हुने भएको छ ।
यसअघि संविधान क्लबमा सीजेपी र सरकारका प्रतिनिधि मण्डलबीच करिब ५० मिनेटसम्म छलफल भएको थियो । सीजेपीको तर्फबाट प्रवक्ता सौरभ दास र आशुतोष रंकाले वार्ता गरेका थिए भने सरकारको तर्फबाट केन्द्रीय स्वास्थ्य मन्त्री जेपी नड्डा र प्रधानमन्त्री कार्यालयका राज्यमन्त्री जितेन्द्र सिंह सहभागी थिए ।

धर्मेन्द्र प्रधानको राजीनामामा सम्झौता नहुने
बैठकपछि सीजेपी प्रवक्ता सौरभ दासले मन्त्रीहरूसँग करिब १० मिनेट छलफल भएको बताए । उनका अनुसार सरकारले सीजेपीका तीन मागमध्ये दुई मागमा सकारात्मक संकेत दिएको छ । सौरभ दासका अनुसार निट तयारी गर्ने क्रममा आत्महत्या गरेका विद्यार्थीका परिवारलाई १ करोड रुपैयाँ क्षतिपूर्ति दिने प्रस्तावमा सरकार सकारात्मक देखिएको छ । साथै आन्दोलनकारी विद्यार्थीमाथि दर्ता गरिएका मुद्दा र कानुनी मुद्दा फिर्ता लिने विषयमा पनि सरकारको धारणा सकारात्मक रहेको उनले बताए । तर तेस्रो मागबारे भने सहमति हुन नसकेको उनले बताए । उनले भने, ‘धर्मेन्द्र प्रधानको राजीनामाको हाम्रो मागमा कुनै सम्झौता हुँदैन ।’

दुई मागमा सैद्धान्तिक सहमति
सीजेपीका राष्ट्रिय प्रवक्ता आशुतोष रंकाले भने, ‘सरकारले धर्मेन्द्र प्रधानको राजीनामाको मागबारे भोलि दिउँसोसम्मको समय मागेको छ । हामी आशावादी छौँ कि सरकारले उनलाई चाँडै हटाउनेछ । सरकारले निट तयारी गर्ने क्रममा आत्महत्या गरेका विद्यार्थीका परिवारलाई क्षतिपूर्ति दिने र विद्यार्थीमाथि लगाइएका मुद्दा तथा कानुनी कारबाही फिर्ता लिने दुई मागमा सैद्धान्तिक सहमति जनाएको छ ।’

यसअघि २० जुलाईमा पनि भएको थियो वार्ता
यसअघि २० जुलाईमा केन्द्रीय स्वास्थ्य मन्त्रीको सरकारी निवासमा भएका लगातार दुई चरणका बैठकमा सौरभ दास र आशुतोष रंका सहभागी भएका थिए । उता सामाजिक अभियन्ता सोनम वाङचुकले आफ्ना प्रमुख मागमा सरकारबाट आश्वासन पाएपछि २६ दिनदेखि जारी अनशन बिहीबार राति अन्त्य गरेका थिए । त्यसपछि आज संविधान क्लब अफ इन्डियाको विठ्ठलभाई पटेल हाउसमा यो वार्ता भएको हो ।

यसअघि सीजेपीले मन्त्रीको निवास वा कार्यालयमा वार्ता गर्ने सरकारको निमन्त्रणालाई अस्वीकार गरेको थियो । उसले आपसी सहमतिमा तय गरिएको स्थानमा मात्र वार्ता गर्ने बताएको थियो । सीजेपीले केन्द्रीय शिक्षामन्त्री धर्मेन्द्र प्रधानले राजीनामा नदिएसम्म जन्तर–मन्तरमा प्रदर्शन जारी राख्ने बताएको छ ।

धर्मेन्द्र प्रधानको राजीनामा बाहेक संगठनले प्रतियोगी परीक्षामा भएको भनिएको अनियमितताको जिम्मेवारी तय गर्नुपर्ने, शिक्षा प्रणाली सुधार गर्नुपर्ने, निट प्रश्नपत्र चुहावटपछि आत्महत्या गरेका विद्यार्थीका परिवारलाई १–१ करोड रुपैयाँ क्षतिपूर्ति दिनुपर्ने र शान्तिपूर्ण आन्दोलनमा सहभागी भएका विद्यार्थीमाथि दर्ता गरिएका सबै एफआईआर तथा कानुनी कारबाही फिर्ता लिनुपर्ने माग राख्दै आएको छ ।