सिरिया : सिरियाको राजधानी दमास्कसमा फ्रान्सका राष्ट्रपति इमानुएल म्याक्रोनको भ्रमणका क्रममा कम्तीमा दुई वटा विष्फोट भएका छन् । सिरियाको गृह मन्त्रालयका अनुसार विष्फोटमा चार जना प्रहरीसहित कम्तीमा १८ जना घाइते भएका छन् । सरकारी समाचार संस्था सिरिया अरब न्यूज एजेन्सी (साना) ले मंगलबार जानकारी दिएको हो ।
टेलिभिजन दृश्यहरूमा शहरमाथि धुवाँको मुस्लो उठेको देखिएको छ । साथै, सामाजिक सञ्जालमा सार्वजनिक भिडियोमा एउटा सवारीसाधनमा आगलागी भएको देखिन्छ । विष्फोट पर्यटन मन्त्रालय नजिक तथा राष्ट्रपति म्याक्रोन बस्ने तयारी गरिएको होटल आसपास भएको थियो । म्याक्रोन त्यहाँ सिरियाका राष्ट्रपति अहमद अल–शरासँग भेटवार्ता गर्न पुगेका थिए ।
म्याक्रोनको कार्यालयले राष्ट्रपति भेटका लागि जाँदै गर्दा विष्फोटको आवाज नसुनेको र भ्रमण पूर्व निर्धारित कार्यक्रमअनुसार नै जारी रहेको जनाएको छ । सिरियाको गृह मन्त्रालयले सानालाई दिएको जानकारीअनुसार विष्फोट फ्रान्सेली राष्ट्रपतिको आवासका लागि तोकिएको सुरक्षा घेराभन्दा बाहिर भएको थियो । त्यसैले यसले राष्ट्रपतिको सुरक्षा वा औपचारिक भ्रमण कार्यक्रमलाई कुनै प्रत्यक्ष खतरा नपु¥याएको र कार्यक्रम तय भएकै तालिकाअनुसार सञ्चालन भइरहेको जनाएको छ ।
घटनापछि सुरक्षा निकायले प्रभावित क्षेत्रका सडकहरू बन्द गरेका छन् भने घटनाबारे अनुसन्धान सुरु गरिएको छ । प्रारम्भिक अनुसन्धानअनुसार दुवै विष्फोट इम्प्रोभाइज्ड एक्स्प्लोसिभ डिभाइस अर्थात् घरेलु रूपमा बनाइएका विष्फोटक उपकरणबाट गरिएका थिए । एउटा सडक किनारमा पार्क गरिएको गाडीभित्र राखिएको थियो भने अर्को फोहोर फाल्ने कन्टेनरभित्र लुकाइएको थियो ।
गृह मन्त्रालयले घटनाको वास्तविक परिस्थिति पत्ता लगाउने र जिम्मेवार व्यक्तिहरूको पहिचान गर्ने कार्य जारी रहेको जनाएको छ । एक सुरक्षा अधिकारीले विष्फोट सर्वसाधारणको चहलपहल बढी हुने क्षेत्रमा भएको र यसलाई ‘आपराधिक कार्य’ भनेका छन् । दमास्कसस्थित सुरक्षा विश्लेषक इस्मत अल–अब्सीले विष्फोटको वास्तविक लक्ष्य तत्काल स्पष्ट नभएको बताए ।
उनले भने, ‘म्याक्रोनको सवारी टोली राष्ट्रपति भवनतर्फ जाँदै गर्दा त्यसलाई नै निशाना बनाइएको थियो वा होइन भन्ने यकिन भइसकेको छैन । तर यसको उद्देश्य अशान्ति फैलाउनु र नकारात्मक सन्देश दिनु रहेको देखिन्छ । साथै, सुरक्षा व्यवस्थामा कमजोरी रहेको स्पष्ट छ, जसलाई सुधार गर्न आवश्यक छ ।’ गत साता पनि दमास्कसको मध्यभागस्थित एक क्याफेमा भएको विस्फोटमा कम्तीमा ९ जनाको मृत्यु भएको थियो भने २० जना घाइते भएका थिए, सिरियाको स्वास्थ्य मन्त्रालयले जनाएको थियो ।
प्रतिक्रिया दिनुहोस !
