विराटनगर : मोरङको लेटाङ नगरपालिकाका पूर्व वडाध्यक्ष रामकुमार श्रेष्ठ अनुचित लेनदेन (मिटरब्याज) सम्बन्धी विवादमा मुछिएका छन् । उनीविरुद्ध मिटरब्याजको उजुरी परेको छ ।
उजुरी परेको सुइँको पाउन साथ उनी प्रहरीको सम्पर्क बाहिर रहेका छन् । उजुरीका आधारमा प्रहरीले अनुसन्धान प्रक्रिया अघि बढाउने तयारी गरिरहेका बेला फरार भएपछि प्रहरीले रामकुमारको खोजी गरिरहेको छ । उनी लेटाङ नगरपालिका–४ का तत्कालीन वडाध्यक्ष हुन् । उनीविरुद्ध ‘हेलो सरकार’ मा अनुचित लेनदेनसम्बन्धी उजुरी परेको थियो । उक्त उजुरी जिल्ला प्रशासन कार्यालय मोरङ हुँदै अनुसन्धानका लागि नेपाल प्रहरी समक्ष पुगेको छ । त्यसपछि प्रारम्भिक अनुसन्धानका लागि रामकुमारलाई सम्पर्क गर्न खोजिए पनि उनी उपस्थित नभएपछि खोजी सुरु गरिएको प्रहरी स्रोतले जनाएको छ ।
स्थानीयका अनुसार रामकुमार लामो समयदेखि अत्यधिक चर्को ब्याजदरमा अनौपचारिक रूपमा ऋण प्रवाह गर्ने कार्यमा संलग्न थिए । उनीमाथि सर्वसाधारणलाई ऋणको जालोमा पारेर निरन्तर ब्याज असुल्ने, ऋणीमाथि आर्थिक तथा मानसिक दबाब सिर्जना गर्ने, जालसाजीपूर्ण कागजात तयार गराउने, सम्पत्ति हडप्ने प्रयास गर्ने तथा विभिन्न किसिमका धम्की दिने आरोप लागेको छ । स्थानीयका अनुसार रामकुमारको मिटरब्याज धन्दाबाट धेरै परिवार आर्थिक संकटमा परेका छन् ।
२०७९ सालको स्थानीय तह निर्वाचनमा नेकपा (एमाले) बाट वडाध्यक्ष निर्वाचित भएका रामकुमार पछि हर्कराज राई (हर्क साम्पाङ) नेतृत्वको श्रम संस्कृति पार्टीमा प्रवेश गरेका थिए । पार्टी परिवर्तन गरेपछि एमालेले उनीमाथि कारबाही गरेको थियो । त्यसपछि उनको जनप्रतिनिधिको पद समेत गुमेको हो । उनलाई साम्पाङ आफैंले पार्टी प्रवेश गराएका हुन् । रामकुमारलाई आगामी २०८४ सालको स्थानीय तह निर्वाचनमा श्रम संस्कृति पार्टीबाट लेटाङ नगरपालिकामा मेयरको उम्मेदवार बनाउने आन्तरिक समझदारी रहेको स्रोतले बतायो ।
प्रहरी स्रोतका अनुसार केही दिनअघि प्रहरी कार्यालयमा उपस्थित हुन मौखिक जानकारी गराइएको थियो । तर, त्यस लगत्तै उनी सम्पर्क बाहिर गएको र मोबाइल समेत बन्द रहेको प्रहरीले जनाएको छ । इलाका प्रहरी कार्यालय लेटाङका इन्स्पेक्टर सागर साह नेतृत्वको टोलीले सम्भावित स्थानहरूमा खोजी जारी राखेको भए पनि हालसम्म रामकुमार फेला परेका छैनन् ।
प्रहरीका अनुसार रामकुमार फेला नपरेका कारण उजुरीमा उल्लेख गरिएको आरोपका बारेमा स्पष्ट हुन सकेको छैन । सम्पर्कविहीन रहेकाले उनीसँग सोधपुछ गरेर तथ्य पुष्टि गर्ने प्रक्रिया समेत अघि बढ्न सकेको छैन । अनुसन्धानमा संलग्न अधिकारीहरूका अनुसार आरोपको प्रकृति, आर्थिक कारोबार र सम्बन्धित कागजातका बारेमा रामकुमारकै भनाइ आवश्यक रहेकाले सम्पर्क स्थापित गर्ने प्रयास भइरहेको छ ।
यता परिवारले भने रामकुमार फरार नभएको दाबी गरेको छ । रामकुमारकी पत्नी विष्णु तामाङ श्रेष्ठका अनुसार उनी दमक जाने भन्दै सोमबार घरबाट निस्किएका थिए । त्यसयता मोबाइल बन्द रहेकाले सम्पर्क हुन नसकेको र परिवार समेत अन्योलमा रहेको उनको भनाइ छ । विष्णुले आफूलाई पति कुनै मिटरब्याज कारोबारमा संलग्न रहेको जानकारी नभएको बताउँदै आरोप पुष्टि गर्न प्रमाण आवश्यक पर्ने धारणा राखिन् । कसैले उजुरी दिएको आधारमै दोषी ठहर गर्न नमिल्ने भएकाले वास्तविकता अनुसन्धानबाटै बाहिर आउनुपर्ने उनको भनाइ छ । रामकुमारसँग केही दिनभित्र सम्पर्क हुने आशा परिवारले राखेको विष्णु बताउँछिन् ।
मोरङ प्रहरी प्रमुख एसपी कवित कटवालले भने प्रहरीले तत्काल पक्राउ गर्ने उद्देश्य नराखेको स्पष्ट पारे । उनका अनुसार रामकुमारविरुद्ध परेको उजुरीमा उल्लेख गरिएका विषयवस्तुको तथ्य बुझ्नका लागि प्रहरीले उनलाई सम्पर्क गर्न खोजेको हो । अनुसन्धानका क्रममा प्राप्त हुने प्रमाणका आधारमा मात्रै थप कानुनी प्रक्रिया अघि बढ्ने वा नबढ्ने भन्ने निष्कर्षमा पुगिने उनले बताए ।
अनुचित लेनदेनसम्बन्धी कसुर पछिल्ला वर्षहरूमा राज्यका लागि गम्भीर सामाजिक तथा कानुनी चुनौतीको विषय बनेको छ । चर्को ब्याजमा अनौपचारिक ऋण प्रवाह गरेर ऋणीलाई आर्थिक रूपमा शोषण गर्ने गतिविधिमाथि सरकारले विशेष निगरानी बढाइरहेका बेला लेटाङका पूर्व जनप्रतिनिधिविरुद्ध परेको उजुरी पनि त्यही अभियानअन्तर्गत अनुसन्धानको दायरामा आएको हो । रामकुमारलाई सम्पर्कमा ल्याएर उजुरीका सबै पक्षको वस्तुनिष्ठ अनुसन्धान गर्न आवश्यक रहेको प्रहरीले जनाएको छ ।
प्रतिक्रिया दिनुहोस !
