अमेरिका : अमेरिकी राष्ट्रपति डोनाल्ड ट्रम्पले अमेरिकी र नाइजेरियाली सेनाले अफ्रिकामा सञ्चालन गरेको सैन्य अभियानमा विश्वव्यापी रूपमा आईएसआईएस का ‘दोस्रो कमाण्डर’ मारिएको बताएका छन् ।
ट्रम्पले आफ्नो सामाजिक सञ्जाल ट्रुथ सोसलमा लेख्दै अमेरिकी र नाइजेरियाली संयुक्त अभियान ‘पूर्ण रूपमा सफल’ भएको र विश्वकै सबैभन्दा सक्रिय आतंकवादीमध्ये एक अबु–बिलाल अल–मिनुकीलाई मारिएको बताएका हुन् । अल–मिनुकीलाई सन् २०२३ मा अमेरिकाले ‘विशेष रूपमा चिन्हित विश्व आतंकवादी’ घोषणा गरेको थियो ।
नाइजेरियाली सेनाले भने हालसम्म उक्त कारबाहीबारे कुनै प्रतिक्रिया दिएको छैन । यदि यो पुष्टि भयो भने, सन् २०१९ मा आईएसका नेता अबु बकर अल–बग्दादी मारिएपछि यो आईएसका लागि अर्को ठूलो धक्का हुन सक्छ । बीबीसीले यसबारे प्रतिक्रिया लिन अमेरिकी सरकार र नाइजेरियाली अधिकारीहरूसँग सम्पर्क गरेको जनाएको छ ।
अबु बकर इब्न मुहम्मद इब्न अली अल–माइनुकीका नामले पनि चिनिने अल–मिनुकीले अफ्रिकाभर आईएससँग सम्बन्धित समूहहरू सञ्चालन गर्दै आएका थिए । विशेष गरी लेक चाड क्षेत्र र साहेल क्षेत्रमा सक्रिय ‘इस्लामिक स्टेट वेस्ट अफ्रिका प्रोभिन्स’) सँग उनको निकट सम्बन्ध रहेको बताइएको छ । यस समूहको प्रभाव नाइजर, चाड र मालीसम्म फैलिएको छ । ट्रम्पको पोस्टमा अभियान कहिले र कसरी सञ्चालन गरियो भन्ने विस्तृत विवरण भने दिइएको छैन ।
ट्रम्पले अल–मिनुकीको मृत्यु आईएसको अफ्रिकी र विश्वव्यापी सञ्जालका लागि ठूलो धक्का भएको बताएका छन् । यसले आईएसको आर्थिक स्रोत र कमाण्ड संरचनामा असर पर्ने उनको भनाइ छ । अमेरिकी राष्ट्रपति ट्रम्पले नाइजेरिया सरकारलाई ‘सहकार्य’ का लागि धन्यवाद दिँदै अब मिनुकीले अफ्रिकाका मानिसहरूलाई आतंकित पार्न वा अमेरिकीहरूलाई लक्षित गर्ने योजना बनाउन नसक्ने बताएका छन् ।
नाइजेरिया र अमेरिकाबीच चरमपन्थी हिंसाविरुद्ध लड्न पछिल्लो समय सैन्य सहकार्य बढिरहेको छ । गत अप्रिलमा नाइजेरियाको उत्तरपूर्वी आदामावा राज्यमा फुटबल मैदानमा भएको आक्रमणमा कम्तीमा २९ जनाको मृत्यु भएपछि आईएसले त्यसको जिम्मेवारी लिएको थियो । त्यसैगरी, गएको क्रिसमसमा अमेरिका र नाइजेरियाले संयुक्त रूपमा नाइजेरियाको सोकोटो राज्यमा आईएससँग सम्बन्धित समूहलाई लक्षित गर्दै हवाई आक्रमण गरेका थिए ।
प्रतिक्रिया दिनुहोस !
