विराटनगर : नेपाली कांग्रेसका सभापति गगनकुमार थापाले सरकारले पछिल्लो समय कानुन र संवैधानिक मूल्य मान्यताभन्दा बाहिर गएर ‘लहडका भरमा’ निर्णय गरिरहेको आरोप लगाएका छन् । विराटनगर विमानस्थलमा बुधबार पत्रकारहरूसँग कुराकानी गर्दै उनले सरकारले विधि मिच्दै लहडमा निर्णय गरिरहेको बताएका हुन् । सरकारलाई जिम्मेवार र सचेत हुन आग्रह गर्दै थापाले नागरिकका जायज मागलाई बेवास्ता गरिए कांग्रेसले सशक्त रूपमा आवाज उठाउने चेतावनी दिए । थापाले भने,‘हामीले सरकारलाई सचेत गराइरहेका छौँ । सुन्छ भन्ने विश्वास पनि राखेका छौँ । तर,नसुने कसरी सुनाउने भन्ने पनि हामीलाई राम्रोसँग थाहा छ ।’
उनका अनुसार पछिल्ला केही निर्णयहरू विधि,प्रक्रिया र कानुनी दायरालाई बेवास्ता गरेर गरिएको भन्दै त्यसले प्रजातन्त्र र सुशासनमाथि नै प्रश्न खडा गरेको छ । संविधान कार्यान्वयन,विधिको शासन र प्रजातन्त्रका आधारभूत मान्यतामा सरकार चुक्न नहुने उल्लेख गर्दै उनले यस्ता विषयमा नेपाली कांग्रेस स्पष्ट र दृढ रूपमा उभिने बताए । उनले हालै सम्पन्न पार्टीको केन्द्रीय कार्यसमितिको बैठकबाटै सरकारका केही गतिविधिप्रति गम्भीर ध्यानाकर्षण गराइएको जानकारी दिए ।
भदौ २४ गतेको घटनाको निष्पक्ष,स्वतन्त्र र न्यायिक छानबिनका लागि तत्काल आयोग गठन गर्न सरकारसँग औपचारिक माग गरिएको उनले बताए । ‘त्यो घटनामा के भयो,कसरी भयो भन्ने सत्य सार्वजनिक हुनुपर्छ । त्यसका लागि न्यायिक छानबिन आयोग अपरिहार्य छ,’उनले भने ।
राज्यको अधिकार र जिम्मेवारीका बारेमा बोल्दै थापाले प्रत्येक नेपाली नागरिकमाथि अनुसन्धान गर्ने अधिकार राज्यसँग रहेको बताए । तर,अनुसन्धानका नाममा कानुन उल्लंघन गर्न नहुने उनको स्पष्ट धारणा छ । ‘कानुनभन्दा माथि कोही हुँदैन । राज्यका निकायहरूले नै विधि मिच्ने हो भने त्यसले प्रजातन्त्रलाई कमजोर बनाउँछ,’उनले जोड दिए ।
कांग्रेसको राजनीतिक भूमिका बारेमा स्पष्ट पार्दै उनले संघीय संसदमा प्रतिपक्षमा रहे पनि सातै प्रदेशमध्ये अधिकांशमा सरकारमा सहभागी रहेको सन्दर्भ उल्लेख गरे । उनले भने,‘सरकारका राम्रा काममा हाम्रो समर्थन रहन्छ भनेर केन्द्रीय कार्यसमितिबाटै निर्णय गरेका छौँ । तर,जनहितका विषयमा सरकार चुक्छ भने हामी तथ्यका आधारमा प्रश्न उठाउँछौँ र आवश्यक परे विकल्पसहित सुझाव पनि दिन्छौँ ।’
प्रमुख प्रतिपक्षीको भूमिका प्रभावकारी नभएको भन्ने आलोचनाबारे प्रतिक्रिया दिँदै उनले कांग्रेस अराजक वा चर्को शैलीमा नभएर जिम्मेवार ढंगले प्रस्तुत भइरहेको बताए । ‘हामी चर्को भाषामा होइन,प्रमाण र तथ्यका आधारमा बोल्छौँ । त्यसैले कतिपयलाई हाम्रो आवाज कम सुनिएको जस्तो लाग्न सक्छ । तर,जहाँ आवश्यक छ,त्यहाँ हामी स्पष्ट रूपमा उभिएका छौँ,’उनले भने ।
गृहमन्त्री सुधन गुरुङसम्बन्धी विवादका बारेमा प्रश्न गर्दा थापाले पार्टीले यसअघि नै आफ्नो आधिकारिक धारणा सार्वजनिक गरिसकेको भन्दै थप टिप्पणी गर्न चाहेनन् । ‘पार्टीले जे भन्नुपर्ने हो, भनिसकेको छ,’उनले संक्षिप्त प्रतिक्रिया दिए । पार्टी एकता र आन्तरिक सुदृढीकरणका बारेमा उनले नेपाली कांग्रेसलाई अझ बलियो,संगठित र प्रभावकारी बनाउन सबै नेताहरूसँग निरन्तर संवाद र छलफल भइरहेको जानकारी दिए ।
आगामी १५ औं महाधिवेशनसम्म पार्टीलाई एकढिक्का बनाएर लैजाने आफ्नो प्राथमिकता रहेको उल्लेख गर्दै उनले सबै पक्षलाई साथ लिएर अघि बढ्ने प्रतिबद्धता व्यक्त गरे ।
प्रतिक्रिया दिनुहोस !
