सिन्धुपाल्चोक : सिन्धुपाल्चोकको बलेफी गाउँपालिका–८ स्थित जाँच चौकीबाट सशस्त्र प्रहरीले ठूलो परिमाणमा अवैध रूपमा भित्र्याइएको चिनियाँ किराना सामानसहित सवारीसाधन नियन्त्रणमा लिएको छ ।
सशस्त्र प्रहरी बलको चेकपोस्ट टोलीले बाह्रबिसेबाट खाडिचौरतर्फ जाँदै गरेको ना.३ ख ५१४० नम्बरको डब्बा भ्यान जाँच गर्ने क्रममा उक्त सामान फेला पारेको हो । सशस्त्र प्रहरी नायब उपरीक्षक सियाराम चौधरीको कमाण्डमा खटिएको टोलीले जाँच गर्दा सामानसँग सम्बन्धित बिल बिजक र भन्सार प्रज्ञापन पत्र नभेटिएपछि नियन्त्रणमा लिएको जनाएको छ ।
बरामद गरिएको चिनियाँ किराना सामानको अन्दाजी मूल्य ८६ लाख ३१ हजार ८ सय रुपैयाँ रहेको छ भने सवारीसाधनको मूल्य करिब १५ लाख रुपैयाँ आँकलन गरिएको छ । यससँगै कुल बरामद मूल्य एक करोड एक लाख ३१ हजार ८ सय रुपैयाँ पुगेको छ । नियन्त्रणमा लिइएको सामान तथा सवारीसाधन आवश्यक अनुसन्धान तथा कारवाहीका लागि तातोपानी भन्सार कार्यालय पठाइएको सशस्त्र प्रहरीले जनाएको छ । सीमा क्षेत्र हुँदै भित्रिने अवैध सामान नियन्त्रणमा चुनौती कायमै रहँदा यस्ता कारबाहीले राजस्व चुहावट रोक्न सहयोग पुग्ने अपेक्षा गरिएको भन्सार कार्यालयले जनाएको छ ।
प्रतिक्रिया दिनुहोस !
