गगन थापाले कांग्रेस सभापतिबाट दिए राजीनामा, केन्द्रीय कार्यसमिति बैठकमा निर्णय हुने
चैत ५, २०८२ बिहीबार ७:३९:३४
काठमाडौं : विशेष महाधिवेशनबाट कांग्रेसको सभापति बनेका गगन थापाले पदबाट राजीनामा दिएका छन्। प्रतिनिधि सभाको निर्वाचनमा कांग्रेस सीमित सिटमा खुम्चिएको र थापा पनि पराजित भएपछि उपसभापति विश्वप्रकाश शर्मासमक्ष राजीनामा दिएका हुन्।
कांग्रेसका एक पदाधिकारीले सभापति थापाले उपसभापति शर्मासमक्ष राजीनामा पेश गरिसकेकाले बैठकमा छलफल हुने बताए। उनले अन्नपूर्णसँग भने, ‘सभापति गगन थापाले उपसभापति विश्वप्रकाश शर्मासमक्ष राजीनामा दिनुभएको हो। शुक्रबार केन्द्रीय कार्यसमितिको बैठक बोलाइएको छ। त्यहीँ स्वीकृत हुने-नहुने निर्णय हुन्छ।’
शर्मा निकट स्रोतका अनुसार अनौपचारिक छलफलमा शर्माले सभापतिलाई राजीनामा नदिन आग्रह गरेको तर नमानेपछि उक्त राजीनामा पत्रलाई आगामी केन्द्रीय समिति बैठकमा पेश गर्ने तयारी छ। थापाले दिएको राजीनामा पत्र भने कांग्रेसले सार्वजनिक गरेको छैन।
यता, कांग्रेसको थोरै सिट र थापासमेत सर्लाहीबाट पराजित भएपछि नियमित महाधिवेशन पक्षधरले मतगणना चलिरहँदा देखिनै तत्काल राजीनामा दिनुपर्ने भन्दै आलोचना बढेको थियो।
कांग्रेसको विधानमा केन्द्रीय सभापतिले राजीनामा दिन चाहेमा उप–सभापतिमार्फत केन्द्रीय कार्यसमितिमा प्रस्तुत गर्नुपर्ने उल्लेख छ। केन्द्रीय कार्यसमितिले राजीनामा स्वीकृत गरेमा उप–सभापतिले कार्यवाहक सभापति भई कार्यभार सम्हाल्नेछ र छ महिनाभित्रमा विशेष केन्द्रीय महाधिवेशन बोलाई केन्द्रीय सभापतिको निर्वाचन गरिनेछ।
गत पौष २७ गतेदेखि ३० गतेसम्म भएको कांग्रेस विशेष महाधिवेशनमा थापा निर्विरोध निर्वाचित भएका थिए। थापाको नेतृत्वमा नयाँ समिति निर्वाचित भएपछि विवादका बीच निर्वाचन आयोगले मान्यता दिएको थियो। तर संस्थापन पक्षबाट कार्यवाहक सभापति पूर्णबहादुर खड्काले विशेष महाधिवेशन अवैधानिक भएको भन्दै सर्वोच्च अदालतले रिट दायर भएको छ।
विशेष महाधिवेशन पक्षधरले तत्कालीन सभापति शेरबहादुर देउवाको अनुहार लिएर नेपाली कांग्रेस चुनावमा जान नसकिने बताएपछि देउवा निर्वाचनको समयमा मतदान नगरी स्वास्थ्य उपचारका लागि भन्दै विदेश गएका थिए।
महाधिवेशनपछि कांग्रेस २.० अभियान सञ्चालन गरिएपनि प्रतिनिधि सभाको निर्वाचनमा रास्वपाले १८२ सिट ल्याउँदा कांग्रेस प्रत्यक्षमा १८ सिट र समानुपातिकमा २० सिटमा खुम्चिएको छ। मतपरिणामपश्चात मौन रहेका थापा सार्वजनिक मञ्चमा पनि देखिएका छैनन्।
यो पनि पढ्नुहोस
प्रतिक्रिया दिनुहोस !
