बैतडी : बैतडीमा राष्ट्रिय स्वतन्त्र पार्टी (रास्वपा) का हरिमोहन भण्डारी विजयी भएका छन् । भण्डारीले २२ हजार १३४ मत प्राप्त गर्दै विजयी भएका हुन् । उनले निकटम प्रतिस्पर्धी नेपाली कांग्रेसका चतुरबहादुर चन्दलाई ३ हजार ९४० मतले पराजित गरेका छन् ।
कांग्रेसका चन्दले १८ हजार १९४ मत प्राप्त गरे । यस्तै नेकपा एमालेका उम्मेदवार दामोदर भण्डारीले १७ हजार ९१ मत पाए । नेकपाका प्रमानन्द भट्टले ६९५६ मत ल्याए । राप्रपाका भुपेन चन्दले २६८१ मत ल्याए । अन्य उम्मेदवारले एक हजार मतपनि कटाउन सकेनन् । बैतडीमा एक स्वतन्त्रसहित ११ जनाको उम्मेदवारी परेको थियो ।
१ लाख ५६ हजार ३७२ मतदाता रहेकोमा ७३ हजार १४८ मतदाताले मतदान गरेका थिए । यसअघि लगातार तीन पटक जीत हासिल गरेका एमालेका दामोदर भण्डारीको परिणाममा ब्रेक लागेको छ ।
युवा समर्थनको बलमा उदाएका हरिमोहन भण्डारी को हुन ?
बैतडीको राजनीतिमा लामो समयदेखि परिचित नाम हुन् हरिमोहन भण्डारी। पञ्चायतकालदेखि नै राजनीतिमा सक्रिय भण्डारी हाल राष्ट्रिय स्वतन्त्र पार्टी (रास्वपा)बाट प्रतिनिधिसभा सदस्यमा विजयी हासिल गरेका छन् ।
वि.स. २०२३ साल कात्तिक १५ गते जन्मिएका भण्डारीले स्नातक तहसम्मको शैक्षिक योग्यता हासिल गरेका छन्। उनका बुवा लक्ष्मण सिंह भण्डारी र आमा रत्ना भण्डारी हुन् । बुवाको प्रेरणाले राजनीतिमा प्रवेश गरेको बताउने भण्डारीको राजनीतिक यात्रा वि.स. २०३५ सालमा राष्ट्रिय प्रजातन्त्र पार्टी (राप्रपा)बाट सुरु भएको हो।
पञ्चायतकालमै राजनीतिमा सक्रिय रहेका भण्डारी वि.स. २०५८ सालमा नेपाली प्रजातान्त्रिक कांग्रेसको क्रियाशील सदस्य बने । त्यसपछि उनी तीन पटक पार्टीको महासमिति सदस्यसमेत बनेर संगठन निर्माणमा सक्रिय रहे । करिब २३ वर्ष नेपाली कांग्रेसमा सक्रिय राजनीति गरेका भण्डारी पार्टीभित्र एक अनुभवी र निरन्तर लागिरहने नेताका रूपमा चिनिन्थे ।
तर यसअघि चुनावी राजनीतिमा उनको यात्रा सहज भने रहेन । वि.स. २०७४ सालको प्रदेशसभा सदस्य निर्वाचनमा उनी पराजित भए । त्यसपछि वि.स. २०७९ सालमा कांग्रेसबाट टिकट पाएनन् । त्यसपछि उनले कांग्रेस परित्याग गरी प्रदेशसभा सदस्यका लागि स्वतन्त्र उम्मेदवार बनेका भण्डारीले ११ हजार १८ मत ल्याए पनि जित हासिल गर्न सकेनन् ।
हाल उनी राष्ट्रिय स्वतन्त्र पार्टीमा आबद्ध भई प्रतिनिधिसभा सदस्यका विजयी हासिल गरेका छन् । लामो राजनीतिक अनुभव, विभिन्न धारको राजनीति भोगेको पृष्ठभूमि र स्वतन्त्र राजनीतिप्रतिको आकर्षण बोकेका भण्डारी यसपटक नयाँ दलमार्फत संसद् प्रवेश गरेका छन् ।
चुनावी दौरान धेरै युवाहरुको साथ पाइरहने भण्डारीले यस पटक पनि युवा तथा जनमासको राम्रो साथ पाएका छन् । सुरुवात देखि नै जनमास पाएर अन्तिमसम्म कायम राखेर संसदीय यात्रा तय गरेका छन् । जिल्लामा बलियो संगठन र दबदबा रहेको दावी गरेका एमाले, कांग्रेस र नेकपालाई टक्कर दिएर भण्डारीले सानदार विजयी हासिल गरेका छन् ।
प्रतिक्रिया दिनुहोस !
