कर्णालीमा नयाँ सत्ता समीकरण : एमाले र नेकपाका नेता काठमाडौं जाँदै

वीरेन्द्रनगर : कर्णाली प्रदेशको पछिल्लो राजनीतिक घटनाक्रमपछि नेकपा (एमाले) र नेपाली कम्युनिस्ट पार्टी (नेकपा) का प्रदेश संसदीय दलका नेताहरू काठमाडौं जान लागेका छन् । प्रदेशमा देखिएको सत्ता साझेदारी, अविश्वास प्रस्ताव र नयाँ सरकार गठनबारे अन्यौल बनिरहेका बेला उनीहरु काठमाडौं जान लागेका हुन् ।

शनिबार मुख्यमन्त्री पदबाट राजीनामा दिएका एमाले संसदीय दलका नेता यामलाल कँडेल तथा नेकपा कर्णाली प्रदेश संसदीय दलका नेता मंगलबहादुर शाही आइतबार काठमाडौं जाँदैछन् । नेकपा संसदीय दलका नेता शाहीले शनिबार पार्टी केन्द्रले गरेको नयाँ राजनीतिक सहमतिका आधारमा प्रदेश सरकार गठनका बिषयमा पार्टी नेतृत्वसँग छलफल गर्न काठमाडौं जान लागेको बताए । उनले भने, ‘नयाँ सहमतिका आधारमा प्रदेश सरकारको गठन गर्न पार्टी नेतृत्वसँग छलफल गर्नुछ । हामी दुई ठूला राजनीतिक दलहरु मिलेर बन्ने प्रदेश सरकारको प्रभावकारी कार्यसम्पादनका लागि पनि दुबै पार्टीका केन्द्रीय नेतृत्वसँग छलफल हुन्छ ।’

केन्द्रमा एमाले र नेकपाबीच सत्ता सहकार्यको सहमति भए पनि कर्णाली प्रदेशको सत्ता समीकरण भने एमाले र नेकपाका लागि त्यति सहज छैन् । नेकपाकै पहलमा कांग्रेससँग मिलेर एमाले नेतृत्वको सरकारबिरुद्ध अविश्वासको प्रस्ताव दर्ता गरेको नेकपाले प्रदेशको नेतृत्व लिनका लागि फेरि एमालेकै साथ लिनुपर्ने अवस्था आएको छ । कर्णालीमा नेपाली कांग्रेससँग मिलेर मुख्यमन्त्री कँडेलविरुद्ध अविश्वासको प्रस्ताव दर्ता भएपछि एमाले र नेकपाबीचको सम्बन्ध चिसिएको थियो ।

यता नेकपा एमालेका प्रदेश संसदीय दलका नेता एवं निवर्तमान मुख्यमन्त्री यामलाल कँडेलले आफू आफ्नो व्यक्तिगत कामका लागि काठमाडौं जान लागेको बताए । उनले भने, ‘म मेरो व्यक्तिगत कामका लागि काठमाडौं जान लागेको हुँ । तर काठमाडौं गएका बेला पार्टीको नेतृत्वसँग भेटघाट भने होला। तर प्रदेश सरकारको बिषयमा मलाई अहिलेसम्म कुनै दलले समन्वय गरेका छैनन् । यति कसैले गरे पनि प्रदेश सरकार गठनका बिषयमा काठमाडौंमा छलफल हुँदैन ।’ यहाँको बिषयमा कर्णालीमै छलफल हुन्छ । प्रदेशमा उत्पन्न राजनीतिक विवादलाई समाधान गर्दै नयाँ सत्ता समीकरणलाई कार्यान्वयन गर्ने उद्देश्यले शीर्ष नेतृत्वले प्रदेशका नेताहरूसँग प्रत्यक्ष छलफल गर्न लागेको स्रोतले जनाएको छ ।