भोजपुर : आसन्न निर्वाचनका लागि खटिएको नेपाली सेनाको बस दुर्घटना हुँदा २६ जना घाइते भएका छन्। भोजपुर नगरपालिका–३, गुप्तेश्वरको नाम्ताङ (सेतीबगर) स्थित पुष्पलाल मध्यपहाडी लोकमार्ग अन्तर्गत बा ४ ख ७३१७ नम्बरको नेपाली सेना सवार बस सडकबाट करिब ५ सय मिटर तल खसेको हो।
निर्वाचनका लागि टेम्केमैयुङ गाउँपालिकाको स्थलगत अनुगमनपछि फर्कँदै गरेको बस दुर्घटना हुँदा बसमा सवार नेपाली सेनाका २३ जना, १ जना सहयोगी, चालक र सहचालकसहित २६ जना घाइते भएका हुन् । दुर्घटनामा ८ जनाको अवस्था गम्भीर रहेको प्रहरीले जनाएको छ।
घाइतेहरूलाई उपचारका लागि तत्काल जिल्ला अस्पताल भोजपुर ल्याइएको थियो। गम्भीर घाइतेलाई नेपाली सेनाको हेलिकप्टरबाट काठमाडौँ लगिएको छ । सामान्य घाइतेको जिल्ला अस्पतालमै उपचार भइरहेको जिल्ला प्रहरी कार्यालय भोजपुरका डिएसपी राजु लामाले जानकारी दिए।
प्रतिक्रिया दिनुहोस !
