सिद्धान्तमा सम्झौता गरेर कांग्रेस अब कहिल्यै सरकारमा जाँदैन : गगन थापा

काठमाडौं : नेपाली कांग्रेसका सभापति गगन थापाले सिद्धान्तमा सम्झौता गरेर अब आफ्रनो पार्टी कुनै र कहिल्यै सरकारमा नजाने बताएका छन् । 
काठमाडौं निर्वाचन क्षेत्र–५ को क्षेत्रीय समितिले आयोजना गरेको कार्यक्रममा बोल्दै सभापति थापाले सिद्धान्त, मूल्य र मान्यतामा सम्झौता गर्नु परे अब कांग्रेस एउटा नभई पाँच वटा सरकारमा नजाने दावी गरे ।

सरकार बनाउने, सरकारमा जाने अवसर पार्टी जीवनमा आइरहने बताउँदै सभापति थापाले आफूहरु बन्न, बनाउन चाहने, चुनाव जित्ने तर सम्झौता गरेर अब सरकारमा नजाने स्पष्ट पारे । पञ्चायतका बेला बीपी कोइरालाले एउटा निवेदन मात्र लेखेको भए प्रधानमन्त्रीबाट निस्किनु पर्ने, जेल बस्नुपर्ने अवस्था नहुने स्मरण गर्दै सभापति थापाले कांग्रेसको विचार र सिद्धान्तलाई आत्मसात गर्दै बीपी बरु आठ वर्ष झ्यालखाना बसेको बताए । 

‘यही कांग्रेस होइन भइरहेको प्रधानमन्त्री आठ वर्ष झ्यालखानामा बसेर आएको, त्यो बेला एक निवेदन लेखेको भए बीपी कोइराला फेरि प्रधानमन्त्री बन्नु हुन्थ्यो होला नि त ! सत्ता नै सबै कुरा थियो, सरकार नै सबै कुरा थियो भने त कांग्रेस त निरन्तर सत्तामा रहिराख्थ्यो होला नि त’, थापाले भने, ‘त्यो कांग्रेस होइन हामी ? त्यस्तै कांग्रेस बनाउने हो फेरि । हामी बनाउँछौं ।’ उनले नेपालको सन्दर्भमा चुनावअघि गरिने गठबन्धन ठगबन्धन भएको पनि बताए । त्यसैले यस पटक कुनै पार्टीसँग गठबन्धन नगरेर कांग्रेसले १६५ वटै क्षेत्रमा उम्मेदवार उठाएको थापाले बताए ।