रुकुम पूर्व : रुकुम पूर्वका उच्च पहाडी तथा हिमाली क्षेत्रमा भारी हिमपात भएको छ। हिमपातका कारण जनजीवन प्रभावित भएको छ। मंगलबार रातिदेखि परेको हिमपातका कारण मध्यपहाडी लोकमार्गसहित विभिन्न स्थानमा सडक अवरुद्ध भएको छ भने सवारी आवागमनसमेत प्रभावित भएको छ ।
जिल्ला प्रशासन कार्यालय रुकुम पूर्वले जिल्लाका उच्च पहाडी तथा हिमाली क्षेत्रमा परेको भारी हिमपातका कारण जनजीवन प्रभावित भएको जनाउँदै उच्च सतर्कता अपनाउन सबैलाई आग्रह गरेको छ ।
हिमपातको जोखिमलाई मध्यनजर गर्दै स्थानीय बासिन्दालाई सुरक्षित रहन,अत्यावश्यक कामबाहेक यात्रा नगर्न तथा काम विशेषले यात्रा गर्नुपर्ने अवस्थामा विशेष सावधानी अपनाउन अनुरोध गरिएको छ ।
हिमपातका कारण सडक अवरुद्ध भई यातायात सञ्चालनमा समस्या देखिएकाले जिल्लास्थित यातायात व्यवसायीलाई मौसमको पूर्वानुमानको आधारमा मात्र सवारी साधन सञ्चालन गर्न पनि प्रशासनले आग्रह गरेको छ ।
त्यस्तै,हिउँ खेल्न आउने,हिमाल आरोहण तथा पदयात्रामा निस्कने आन्तरिक तथा बाह्य पर्यटकलाई समेत उच्च सतर्कता अपनाउन जिल्ला प्रशासन कार्यालयले अनुरोध गरेको छ ।
प्रतिक्रिया दिनुहोस !
