दाहिने घुम्नुपर्ने जहाज आकाशमै देब्रे कोल्टिएको थियो
यती एयरको जहाज दुर्घटना
माघ १, २०७९ आइतबार १४:२०:०
पोखरा :साढे ११ बजे अवतरण गर्नुपर्ने यती एयरलाइन्सको जहाजले पोखरा अन्तर्राष्ट्रिय विमानस्थलको माथिको आकाश पार गरिसकेको थियो । जहाज पुरानो पोखरा विमानस्थलपोर्ट माथिको आकाश पुग्नै लागेको थियो,भुइँ झर्यो र दुर्घटनाग्रस्त भयो ।
काठमाडौंबाट पोखरा आउने जहाज नयाँ विमानस्थलमा अवतरण गर्नुअघि पुरानो विमानस्थलको आकाश पुगेर फन्को मार्छन् । आइतबार यती एयरलाइन्सको नाइन एन-एएनसी जहाज त्यसै गर्ने गरी पुरानो एयरपोर्टतिर जाँदै थियो । ‘टावरसँग कन्ट्याक्ट गरेरै उता गएको हो,’नयाँ एयरपोर्टका एक कर्मचारीले अन्नपूणर्सँग भने ।
तर,पुरानो एयरपोर्टको आकाश पुग्न १ मिनेट पनि नपुग्दै जहाज आकाशमै कोल्टियो र सेतीनदीको खोँचमा खस्यो ।
जहाज दायाँ घुमेर फेरि नयाँ एयरपोर्टमा अवतरण पुग्नुपर्नेमा सेती नदी पार गर्नअुघि नै बायाँ कोल्टिएर खसेको प्रत्यक्षदर्शी बताउँछन् । जहाज खस्नुअघि नै आकाशमै कोल्टिएको दुर्घटनास्थल वरिपरिको घरका बासिन्दा बताउँछन् । ‘धन्न जहाज सेतीमा खस्यो, हाम्रा घरतिर ठोक्किएन,’तिनले भने,‘घरहरुतिर ठोक्किएको भने अझै धेरै क्षति हुनसक्थ्यो ।’
दुर्घटनाको कारण भने खुल्न सकेको छैन। जहाजमा ७२ जना सवार थिए । ६८ जना यात्रु र ४ जना चालक दलका सदस्य हुन् । जसमा ५३ जना नेपाली र
१५ विदेशी नागरिक थिए।
प्रतिक्रिया दिनुहोस !
