भक्तपुर : नेपाली कम्युनिस्ट पार्टीका संस्थापक नेता पुष्पलाल श्रेष्ठको ४८ औं स्मृति दिवसका अवसरमा नेपाली कम्युनिस्ट पार्टी भक्तपुरले थिमि बैंक्वेटमा स्मृति सभा सम्पन्न गरेको छ । नेपाली कम्युनिस्ट आन्दोलनलाई वैचारिक, संगठनात्मक र संघर्षको स्पष्ट मार्गदर्शन दिएका पुष्पलालको बाटो अहिले पनि उत्तिकै सान्दर्भिक रहेको भन्दै उपस्थित नेताकार्यकर्ताले उनीप्रति भावपूर्ण श्रद्धाञ्जली अर्पण गरेका छन् ।
नेपाली कम्युनिस्ट पार्टीका भक्तपुर जिल्ला इन्चार्ज डीपी ढकालले पुष्पलालले देखाएको समाजवादको बाटो नेपाली जनताको सपनासंग जोडिएको जिकिर गर्दै समाजवादी आन्दोलनलाई एकताबद्ध बनाउनु पर्ने आवश्यकता औल्याए । केन्द्रीय सदस्य दिलीप प्रजापतिले पुष्पलालको विचारलाई व्यवहारमा लागू गर्नुपर्ने र जनताको पक्षमा निरन्तर संघर्ष गर्नुपर्नेमा जोड दिए ।
पुष्पलालप्रति श्रद्धाञ्जली अर्पण गर्दै नेकपाका केन्द्रीय सदस्यहरु रामप्रसाद सापकोटा ‘दीपशिखा’, भवानी खड्का, उमा कपाली, अन्जना तिमल्सिना र सुनिल बासु त्यसैगरी बागमती प्रदेश सभाकी सदस्य भुवनकेशरी श्रेष्ठ भावना र मध्यपुर थिमि नगरपालिकाको उपप्रमुख बिजयकृष्ण श्रेष्ठ लगायतले कम्युनिस्ट बिरोधि गतिविधिको प्रतिरोध गर्ने तथा देश र जनताको पक्षमा निरन्तर लागिरहने प्रतिबद्धता प्रकट गरेका थिए ।
सो अवसरमा नेपाली कम्युनिस्ट पार्टीको सदस्यता अनलाइनबाट नवीकरण गर्ने बिधिबारे केन्द्रीय सदस्य शिव खकुरेलले प्रशिक्षण समेत प्रदान गरेका पार्टीका भक्तपुर जिल्ला संयोजक श्यामसुन्दर बस्नेतले बताए । पुष्पलाल श्रेष्ठ नेपाली कम्युनिस्ट आन्दोलनका संस्थापक नेता मानिन्छन् । २००६ सालमा नेपाल कम्युनिस्ट पार्टीको स्थापना गर्दै उनले नेपालमा वैज्ञानिक समाजवादको बिजारोपण गरेका थिए ।
निरंकुश राणा शाशन र पन्चायती ब्यवस्थाका साथै सामन्तवाद विरुद्ध संघर्षमा उल्लेखनीय योगदान पुर्याएका उनले समाजवादको स्पष्ट राजनीतिक कार्यदिशा प्रस्तुत गरेका थिए । उनको योगदानको सम्मानमा ४८ औं स्मृति दिवसको कार्यक्रम आयोजना गरिएको नेकपा भक्तपुरका सहसंयोजक सुरेश न्यौपानेले जानकारी गराए ।
प्रतिक्रिया दिनुहोस !
