काठमाडौं : अन्नपूर्ण मिडिया नेटवर्कको कार्यकारी निर्देशकमा लालबहादुर ऐरी नियुक्त भएका छन् । अन्नपूर्ण मिडिया नेटवर्क व्यवस्थापनको निर्णयअनुरुप साउन १ गतेदेखि लागू हुने गरी ऐरीलाई कार्यकारी निर्देशक पदमा नियुक्त गरिएको हो ।
अन्नपूर्ण मिडियाको मुख्यालयमा बिहीबार आयोजित एक समारोहमा अन्नपूर्ण मिडिया नेटवर्कका अध्यक्ष क्याप्टेन रामेश्वर थापा, प्रधान सम्पादक बालकृष्ण बस्नेत, ग्रुपका सीईओ पंकज बास्कोटासहितले नव नियुक्त कार्यकारी निर्देशक ऐरीलाई स्वागत गरेका थिए । ऐरी यसअघि गोरखापत्र संस्थानको महाप्रबन्धक थिए ।
ऐरीसँग न्यूज रिपोटिङ, सेल्स, डिस्टिब्यूर्सन, मार्केटिङ, कर्पोरेट रणनीति, कार्यसम्पादन व्यवस्थापन, ब्रान्ड व्यवस्थापनलगायतको अनुभव छ ।
कार्यक्रममा अन्नपूर्ण मिडिया नेटवर्कका अध्यक्ष क्याप्टेन रामेश्वर थापाले अन्नपूर्ण देशको एक महत्वपूर्ण समाचार संस्था भएको उल्लेख गर्दै आफूहरु नयाँ शैली र तौरतरिकामा अगाढि बढ्ने जमर्कोमा रहेको बताएका छन् ।
अध्यक्ष थापाले मिडिया क्षेत्रमा देखिएको विषम परिस्थितिलाई मध्यनजर गर्दै समय अनुसार संस्थालाई व्यवस्थापन गर्दै जानु पर्ने विभिन्न चुनौतिहरु रहेको बताएका छन् । अन्नपूर्ण पोस्ट दैनिकका प्रधान सम्पादक बालकृष्ण बस्नेतले हरेक संस्थामा समस्या र अवसर दुबै हुने बताउँदै चुनौतिहरुलाई अवसरमा बदल्दै अगाडि बढ्नु पर्ने आवश्यकता औंल्याएका छन् । उनले वर्तमान विषम परिस्थितिमा फरक तरिका र बाटोबाट मात्र सञ्चार संस्था बचाउन सकिने र सञ्चारकर्मीहरुलाई टिकाउन सकिने बताएका छन् ।
नव नियुक्त कार्यकारी निर्देशक लालबहादुर ऐरीले अन्नपूर्ण मिडिया नेटवर्क जस्तो प्रतिष्ठित र गौरवपूर्ण संस्थामा जोडिन पाउनु आफ्ना लागि गौरवको विषय भएको बताएका छन् । उनले ‘मिडिया क्राइसिस’ अहिले सबैतिरको समस्या भएको बताउँदै यसलाई सबैको सहकार्यमा रणनीतिक रुपमा व्यवस्थापन गर्दै जानु पर्ने बताए । उनले संस्थालाई सुदृढ बनाउन आफ्नो ज्ञान, सीप र क्षमताले भ्याएसम्म योगदान गर्ने प्रतिवद्धता जनाएका छन् । कार्यक्रममा अन्नपूर्ण एक्सप्रेसका सम्पादक कमल देव भट्टराई, रेडियो अन्नपूर्णका समाचार प्रमुख भूपाल लुइँटेललगायतको उपस्थिति थियो ।
प्रतिक्रिया दिनुहोस !
