मसाज सेन्टरमा विकृति पनि देखियो, नियमन गर्ने काम हुँदैछ : मन्त्री पौडेल

काठमाडौं : संस्कृति, पर्यटन तथा नागरिक उड्डयनमन्त्री खडकराज पौडेलले हचुवाको भरमा विमानस्थल निर्माण गर्दा राज्यलाई ठूलो नोक्सानी हुन सक्ने बताएका छन् । 

सिंहदरबारमा बुधबार बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समिति बैठकमा मन्त्री पौडेलले विमानस्थललाई केवल यातायातको साधन मात्र नभई पर्यटन प्रवद्र्धनको माध्यम बनाउनु पर्ने भन्दै हचुवाको भरमा विमानस्थल निर्माण गर्दा राज्यलाई ठूलो नोक्सानी हुन सक्ने बताएका हुन् । पोखरा र भैरहवामा अत्याधुनिक अन्तराष्ट्रिय विमानस्थल निर्माण गरे पनि यात्रु अभावका कारण सञ्चालनमा समस्या भएको उनले बताए ।

उनले लक्ष्य अनुसार पर्यटकको संख्या भित्र्याउनका लागि आवश्यक पर्ने पूर्वाधारको विकास र नीतिगत व्यवस्थाको टुङ्गो लगाउनु पर्ने धारणा राखे । समग्र नागरिक उड्डयन क्षेत्रको विकास विना पर्यटनको दिगो विकास सम्भव नरहेको मन्त्री पौडेलको भनाइ छ । उनले पूर्णरूपमा विदेशी एअरलाइन्स वा निजी कम्पनीहरूमा मात्र भर परेर नेपाल जस्तो सानो मुलुकले नागरिक उड्डयन र पर्यटन क्षेत्रमा लामो फड्को मार्न नसक्ने समेत बताए ।

त्यस्तै मन्त्री पौडेलले नियमन अभावका कारण मसाज सेन्टरहरुमा बिकृति देखिएको भन्दै यस्ता क्षेत्रहरूलाई नियमनभित्र ल्याउने काम भइरहेको जानकारी दिए । मसाज सेन्टरहरू पर्यटन विभागमा दर्ता नभई सामान्य वडा, घरेलु वा अन्य निकायमा दर्ता भएर विना कुनै नियमन, तालिम र मापदण्ड चलिरहेको उनले बताए ।

मन्त्री पौडेलले आरोग्य पर्यटन वर्ष मनाइरहँदा यस क्षेत्रमा जथाभाबी काम गरिरहेका व्यक्तिहरूलाई उचित तालिम दिनु, योग्य बनाउनु, प्राज्ञिक रूपमा सम्पन्न गराउनु र व्यावसायिक रूपमा दक्ष बनाउनु अहिलेको आवश्यकता भएको धारणा राखे । बैठकमा समिति सदस्यहरुले पोखरा र भैरहवा अन्तर्राष्ट्रिय बिमानस्थलाई नियमित सञ्चालन गर्न आवश्यक कदम चाल्न सरकारलाई सुझाव दिएका थिए । समिति सदस्य अभिषेकप्रताप शाहले अर्बौ खर्च गरि बनाइएको गौतमबुद्ध अन्तर्राष्ट्रिय विमानस्थलमा अन्तर्राष्ट्रिय उडान निकै कम भएकाले आन्तरिक उडानका लागि पनि प्रयोग गर्न सुझाव दिए ।

त्यस्तै समिति सदस्य धनन्जय रेग्मीले अर्बौको लगानीमा बनेका विमानस्थलमा पनि धेरै कमजोरी देखिएका कारण सञ्चालनमा समस्या देखिएको बताए । भैरहवा र पोखरा जस्ता विमानस्थलहरूबाट वैदेशिक रोजगारीमा जाने श्रमिकहरूलाई लक्षित गरिए पनि आवश्यक मेडिकल सेन्टर, भिसा सेन्टर र अध्यागमन जस्ता सेवाहरू प्रभावकारी रूपमा राख्न नसकिएको उनले बताए ।