भेनेजुएला भुकम्प : हालसम्म १,४४० को मृत्यु पुष्टि,  ६९ हजार ९०० जना अझै बेपत्ता

भेनेजुएला : भेनेजुएलामा जुन २५ मा गएको दुई शक्तिशाली भूकम्पले ठूलो जनधनको क्षति पु¥याएको छ । प्राप्त पछिल्लो विवरणअनुसार यस विपदा हालसम्म १,४३० जनाको मृत्यु पुष्टि भएको छ । यद्यपि वास्तविक मृतक संख्या अझ धेरै हुन सक्ने अनुमान गरिएको छ । अधिकारीहरूका अनुसार ६८,९०० भन्दा बढी व्यक्ति अझै बेपत्ता रहेको जानकारी दिएका छन् । उद्धार टोलीहरूले भग्नावशेषबाट लगातार शव निकालिरहेका छन् ।

यसैबीच, देशको उत्तरी तटीय क्षेत्रमा फेरि भूकम्पका धक्का महसुस भएका छन् । रोयटर्सका अनुसार राजधानी कराकास र माराके क्षेत्रमा ४.९ म्याग्निच्युडको भूकम्प गएको हो ।  सबैभन्दा बढी प्रभावित क्षेत्रमध्ये एक ला गुआइरा राज्यमा स्थानीय बासिन्दाहरू आफ्ना आफन्त र छिमेकीको खोजीमा फावडा, डोरी, भारी उपकरण तथा आफ्नै हात प्रयोग गरेर भग्नावशेष हटाइरहेका छन् । यस विपदमा ३,३६० भन्दा बढी व्यक्ति घाइते भएका छन् भने शनिबार मात्रै करिब २५० जनालाई जीवित उद्धार गरिएको अधिकारीहरूले बताएका छन् ।

आफन्तको खोजीमा आफैं जुटे स्थानीय

राहत तथा उद्धार टोलीको अभावका कारण धेरै नागरिक आफैंले भग्नावशेष हटाएर आफ्ना परिवारका सदस्यहरूको खोजी गरिरहेका छन् । कार्यवाहक राष्ट्रपति डेल्सी रोड्रिगेजले सर्वसाधारणलाई ला गुआइरा राज्यतर्फ अनावश्यक यात्रा नगर्न आग्रह गर्दै अहिलेको मुख्य प्राथमिकता बढीभन्दा बढी मानिसको उद्धार गर्नु रहेको बताइन् । उनले उद्धार कार्य सहज बनाउन सडक खाली राख्न र प्रहरी, नागरिक सुरक्षा तथा दमकल टोलीलाई छिटो प्रभावित क्षेत्रमा पुग्न सहयोग गर्न अपिल गरेकी छन् ।

एक हजारभन्दा बढी संरचनामा क्षति
बीबीसीका अनुसार उत्तरी तटीय क्षेत्र र राजधानी कराकासमा सयौं भवन, अस्पताल तथा सपिङ सेन्टर पूर्ण रूपमा ध्वस्त भएका छन् । साथै, करिब १,००० वटा पूर्वाधार संरचनामा गम्भीर क्षति पुगेको छ । सबैभन्दा ठूलो क्षति कराकासको उत्तरमा रहेको ला गुआइरा क्षेत्रमा भएको छ, जहाँ देशको मुख्य बन्दरगाह र सिमोन बोलिभार अन्तर्राष्ट्रिय विमानस्थल अवस्थित छन् । यस क्षेत्रमा हालसम्म २४३ जनालाई जीवित उद्धार गरिएको छ ।

अन्तर्राष्ट्रिय सहयोग सुरु
विपत्तिपछि विभिन्न देशबाट अन्तर्राष्ट्रिय राहत तथा उद्धार टोलीहरू भेनेजुएला पुग्न थालेका छन् । संयुक्त राष्ट्रसंघ (यूएन) का मानवीय मामिला प्रमुख टम फ्लेचरले व्यापक अन्तर्राष्ट्रिय राहत अभियान सुरु गर्ने घोषणा गरेका छन् ।

बेलायत, अमेरिका, नेदरल्यान्ड्स, मेक्सिको र स्विट्जरल्यान्डले खोज तथा उद्धार टोली, तालिमप्राप्त खोजी कुकुर र ड्रोन पठाएका छन् । अमेरिकाले यसका साथै युद्धपोत, सैन्य यातायात विमान तथा १५ करोड अमेरिकी डलर (करिब २० अर्ब नेपाली रुपैयाँ भन्दा बढी) बराबरको आर्थिक सहायता उपलब्ध गराउने घोषणा गरेको छ ।

आन्तरिक मामिला मन्त्री डियोसडाडो काबेलोका अनुसार भूकम्पको सबैभन्दा बढी असर कराकासका लोस पालोस ग्रान्डेस र अल्तामिरा क्षेत्रका साथै ला गुआइरा, अरागुआ, काराबोबो र फाल्कोनलगायत उत्तरी तटीय राज्यहरूमा परेको छ ।