काठमाडौं : नेकपा एमालेका सांसद क्षितिज थेबेले सरकारले ल्याएको बजेटले रोजगारी सिर्जना, उद्यम प्रवर्द्धन तथा उत्पादन वृद्धिजस्ता विषयलाई प्राथमिकतामा नराखेको आरोप लगाएका छन्। देशको सबैभन्दा ठूलो समस्या बेरोजगारी भए पनि बजेटले त्यसको समाधानका लागि ठोस कार्यक्रम ल्याउन नसकेको उनको गुनासो छ।
प्रतिनिधिसभाको बैठकमा बजेटमाथिको छलफलमा भाग लिँदै उनले बजेट सार्वजनिक भएपछि युवाहरूमा रोजगारी सिर्जना हुने, बेरोजगारीको पीडा अन्त्य हुने र अर्थतन्त्रले गति लिने अपेक्षा जागेको भए पनि व्यवहारमा त्यस्तो कुनै आधार नदेखिएको बताए।
'देशमा अहिले पनि सबैभन्दा ठूलो समस्या बेरोजगारीको हो,' उनले भने, 'तर श्रम तथा रोजगार मन्त्रालयको बजेट हेर्दा न रोजगारीका लागि ठोस योजना भेटिन्छ, न उद्यमीलाई प्रोत्साहन गर्ने कार्यक्रम। उत्पादन बढाउने विषय पनि बजेटमा समेटिएको छैन।'
सांसद थेबेले आफ्नो गृहजिल्ला ताप्लेजुङ नेपालको कूल अलैंची उत्पादनको करिब ४५ प्रतिशत हिस्सा ओगट्ने जिल्ला भएको उल्लेख गर्दै अलैंची किसानले बजार अभावका कारण ठूलो समस्या भोगिरहेको बताए।
उनले अलैंचीको अन्तर्राष्ट्रिय बजारीकरण, समर्थन मूल्य निर्धारण तथा कृषि बीमाको व्यवस्था गर्न सरकारसँग माग गरे।
चुनावअघि अलैंचीको मूल्य प्रतिमन एक लाख रुपैयाँभन्दा माथि पुगेको भए पनि अहिले घटेर करिब ८० हजार रुपैयाँमा झरेको उल्लेख गर्दै उनले मूल्य घट्दा किसानहरू मारमा परेको बताए। किसानको हित संरक्षणका लागि सरकारले अलैंचीको समर्थन मूल्य तोक्न आवश्यक रहेको उनको भनाइ थियो।
प्रतिक्रिया दिनुहोस !
