खाँदबारी : राष्ट्रिय स्वतन्त्र पार्टी (रास्वपा) संखुवासभाको प्रथम जिल्ला अधिवेशनले भक्तनारायण श्रेष्ठलाई पुनः जिल्ला सभापतिमा सर्वसम्मत रूपमा चयन गरेको छ । आइतबार सम्पन्न अधिवेशनले श्रेष्ठको नेतृत्वमा २१ सदस्यीय नयाँ जिल्ला कार्यसमिति चयन गरेको हो । नवगठित कार्यसमितिको उपसभापतिमा सुमन डाँगी, सचिवमा सुनिल श्रेष्ठ, कोषाध्यक्षमा पवित्रा बजगाई तथा सहसचिवमा सन्तोष बस्नेत चयन भएका छन् ।
रास्वपा प्रथम जिल्ला अधिवेशनबाट पुनः जिल्ला सभापतिमा सर्वसम्मत चयन भएका श्रेष्ठले सम्पूर्ण प्रतिनिधि, सदस्य तथा शुभेच्छुकप्रति आभार व्यक्त गरेका छन् । उनले संगठन सुदृढीकरण, सुशासन, पारदर्शिता र जनताका मुद्दामा आफ्नो नेतृत्वको मुख्य प्राथमिकता हुने बताएका छन् । श्रेष्ठले पार्टीभित्र एकता, अनुशासन र सहकार्यलाई मजबुत बनाउँदै संखुवासभामा स्वच्छ र जिम्मेवार राजनीतिक संस्कार स्थापित गर्ने प्रतिबद्धता व्यक्त गरेका छन् । ‘पद अवसर होइन, जिम्मेवारी हो, नेतृत्व अधिकार होइन, सेवा हो’, भन्दै उनले सबैलाई साझा अभियानमा साथ दिन आग्रह गरेका छन् ।
यसैबीच, जिल्ला समन्वय समितिको सभाहलमा आयोजित उक्त अधिवेशनको बन्दसत्रका क्रममा पदाधिकारी चयन प्रक्रियालाई लिएर विवाद उत्पन्न भएको थियो । पदाधिकारीलाई सर्वसम्मत चयन गर्ने विषयमा मतभेद चर्किएपछि केही समय तनावको अवस्था सिर्जना भएको थियो । विवाद बढ्दै झडपको स्थिति उत्पन्न हुन थालेपछि सुरक्षा व्यवस्थापनका लागि प्रहरी परिचालन गरिएको थियो । बन्दसत्र सञ्चालन भइरहेका बेला प्रहरी सभाहलभित्र प्रवेश गरी अवस्था नियन्त्रणमा लिएको जनाएको छ । यद्यपि, विवादका बीच पनि अधिवेशनले नयाँ नेतृत्व चयन गर्दै आफ्नो प्रक्रिया सम्पन्न गरेको छ ।
प्रतिक्रिया दिनुहोस !
