काठमाडौं : गए राति परेको अविरल वर्षाका कारण अवरुद्ध भएको बीपी राजमार्ग मर्मतपछि हालका लागि पुनः सञ्चालनमा आएको छ । चौकीडाँडादेखि रोशी खण्डसम्म क्षतिग्रस्त सडक मर्मत गरी सवारी आवागमन सुचारु गरिएको ट्राफिक प्रहरी हवल्दार पवन अगस्तीले जानकारी दिएका छन् ।
मौसम पूर्वानुमान विभागका अनुसार अझै पनि वर्षा जारी रहने सम्भावना रहेकाले यात्रा गर्दा आवश्यक सतर्कता अपनाउन अनुरोध गरिएको छ । साथै, आपतकालीन अवस्था सिर्जना भएमा वा सडकको अवस्थाबारे जानकारी लिन १०० र १०३ नम्बरमा सम्पर्क गर्न प्रहरीले आग्रह गरेको छ ।
वर्षाको कारण बीपी राजमार्ग हिजोदेखि बन्द गरिएको थियो । बीपी राजमार्ग रोशी गाउँपालिकाका ५ स्थानको ड्राइभर्सनमा रोशी खोला बाढीको कारण बाटो बन्द गरिएको थियो । घुमाउने, चौकीडाँडा, चार सय बेसी, चिउरीबास र बोक्सिकुनामा बनाएको ड्राइभर्सन मर्मतपछि अहिले बाटो खुलेको छ ।
प्रतिक्रिया दिनुहोस !
