गर्भवती मृत्यु प्रकरण : छानविन समिति गठनपछि परिवारले बुझे गीताको शव

बुटवल : गर्भपतन गराउँदा मृत्यु भएकी बगनासकाली गाउँपालिका–२ पाल्पाकी गीता पाण्डेको शव परिवारले बुझेका छन् । नेपाल मेडिकल काउन्सिलले छानविन समिति गठन गरेर अनुसन्धान शुरु गरेपछि परिवारले शव बुझेका हुन् । उनको शुक्रवार पाल्पास्थित राम्दी खोलामा अन्तिम दाहासंस्कार गरिएको पाण्डेका आफन्त पर्सुराज अर्यालले जानकारी दिए । 

२९ वर्षीय पाण्डेको बुटवलस्थित खत्री नर्सिङ होम, जोनल र इन्दुलेखा फार्मेसीमा डुलाउँदा डुलाउँदै मृत्यु भएको थियो । पाण्डेको पेटमा १२ हप्ताको गर्भ थियो । उपचारमा संलग्न दुई चिकित्सकसहित पाँच जना स्वास्थ्यकर्मीहरुलाई प्रहरीले नियन्त्रणमा लिएर अनुसन्धान गरिरहेको छ । नेपाल मेडिकल काउन्सिलका सदस्य डा. सम्राट पराजुलीको संयोजकत्वमा ६ सदस्यीय छानबिन समिति गठन गरिएको छ ।