भारत : अमेरिका र इरानबीचको युद्धको असर विश्वभर देखिएको छ । जसबाट भारत पनि अछुतो छैन । इरान युद्धका कारण इन्धनमा देखिएको संकटको असर भारतका विभिन्न उद्योगहरुमा देखिएको छ । इन्धन अभावका कारण उद्योग बन्द हुँदा कामदारहरु रोजगारविहीन बन्न थालेका छन् । जसका कारण उनीहरु आफ्नै घर फर्किन वाध्य भएका छन् । इन्धन अभावको असर भारतका सिरेमिक उद्योगहरुमा पनि परेको छ ।
सात वर्षदेखि पश्चिम भारतको सिरेमिक उद्योगमा काम गर्ने प्रदीप कुमार हरेक दिन बिहान ९ बजे कारखानामा पुग्थे । कच्चा पदार्थ–माटो, क्वाट्र्ज र बालुवा भट्टीमा हाल्थे र दिनभरि तातो र धुलोले भरिएको वातावरणमा काम गर्थे ।
उनी माटोलाई विभिन्न चरणमा सम्हाल्थे । कहिले मेसिनमा हाल्थे, कहिले अर्ध–प्रशोधित वस्तुहरूलाई पकाउने प्रक्रियातर्फ सार्थे । काम दोहोरिने र कठिन थियो । उच्च तापक्रमबाट जोगिनका लागि पञ्जा र मास्क जस्ता कुनै सुरक्षात्मक सामग्री थिएनन् ।
‘गर्मी याममा त झनै गाह्रो हुन्थ्यो, किनकी तापक्रम निकै बढ्थ्यो’, उनले भने । तर मार्च १५ मा उनले यहि भएको आफ्नो जागिर पनि गुमाए । उनको वा उनको कम्पनीको कुनै गल्तीका कारण होइन, तर संयुक्त राज्य अमेरिका र इजरायलले इरानमाथि आक्रमण गरेपछि मध्यपूर्वमा फेरि युद्ध सुरु भयो र विश्वव्यापी इन्धन संकट आयो ।
युद्ध सुरु भएको करिब दुई हप्तामै उनले काम गर्ने सिरेमिक कम्पनी प्रोपेन र प्राकृतिक ग्यासे अभावका कारण बन्द भयो । गुजरात राज्यको मोरबीमा रहेको उक्त कम्पनी—अन्य सिरेमिक उद्योगहरू जस्तै—यी आवश्यक इन्धनमा निर्भर छ । मोरबी भारतको सिरेमिक उद्योगको केन्द्र हो । जहाँ ४ लाखभन्दा बढी मानिस कार्यरत छन् ।
तीमध्ये आधाभन्दा बढी कामदारहरू कुमार जस्तै उत्तर प्रदेश र बिहार जस्ता गरिब राज्यहरूबाट आएका आप्रवासी हुन् । २९ वर्षीय कुमारले जागिर गुमाएको पाँच दिनपछि आफ्नी श्रीमती र तीन सन्तानलाई लिएर उत्तर प्रदेशको हरदोई जिल्लास्थित घर फर्किए । ‘हामीसँगै घर फर्किएका अन्य आप्रवासी कामदारहरू फेरि काममा नफर्कुन्जेल म यहीँ बस्छु’, उनले सुनाए ।
प्रतिक्रिया दिनुहोस !
