लागुऔषध कारोवारी पक्राउ गर्न रुपन्देही प्रहरीले चलायो गोली, दुईजना घाइते
चैत २४, २०८२ मंगलबार १२:३१:५९
बुटवल : रोहिणी गाउँपालिका–४ कोटहवा रुपन्देहीमा नेपाल प्रहरीले गोली हानेर भारतीय सिमानाकाहुँदै लागुऔषध ओसारपसार गर्ने कारोवारीलाई पक्राउ गरेको छ । भारतबाट नेपालतर्फ आउँदै गरेको यूपी ५६ एफ ९९०१ नम्वरको मोटरसाइकललाई चेकजाँच गर्न खोज्दा प्रहरीमाथि नै ढुंगामुढा गरी आक्रमण गरेपछि प्रहरीले गोली चलाएको थियो ।
लागुऔषध नियन्त्रण ब्यूरो भैरहवाका प्रहरी नायव निरीक्षक सागर भट्टराईको टोलीले प्रहार गरेको गोली लागेर रोहिणी गाउँपालिका- २ खुरुहुरिया रुपन्देहीका विशाल यादव घाइते भएका छन् । उनको भैरहवास्थित भीम अस्पतालमा उपचार गरिएको छ । घाइते यादवको अवस्था सामान्य रहेको प्रहरीले जनाएको छ ।
कारोवारीहरूले हानेको ढुंगामुढाबाट प्रहरी नायव निरीक्षक भट्टराई सामान्य घाइते भएका छन् । उनको खुट्टामा चोट लागेको छ । कारोवारमा संलग्न अन्य भारतीय दुई युवालाई प्रहरीले नियन्त्रणमा लिएर अनुसन्धान अघि बढाएको छ ।
महाराजगंज पर्सामालिक ग्राम बिसुनपुरवा बस्ने १८ वर्षीय अरुण कुमार र सोही ठाउँका २० वर्षीय विनय पाण्डेय पक्राउ परेका छन् । प्रहरीले उनीहरूको साथबाट फेनारागन ११०० एम्पुल, डाईजोपम्म ११०० एम्पुल र बुफ्रिनुफ्रीन ११०० एम्पुल गरी जम्मा ३ हजार तीन सय एम्पुल नियन्त्रणमा लिएको छ ।
प्रतिक्रिया दिनुहोस !
