सिमरा : बाराको सिम्रौनगढ नगरपालिका–६ स्थित पावर हाउस क्षेत्रमा बुधबार भएको मोटरसाइकल दुर्घटना परी गम्भीर घाइते एक महिलाको मृत्यु भएको छ । मृत्यु हुनेमा ६० वर्षीया सायबुन खातुन रहेकी छिन् ।
दुर्घटनामा गम्भीर घाइते भएकी खातुनको बुधबार साँझ मृत्यु भएको हो । उनको टाउको र दाँतमा गम्भीर चोट लागेको थियो । प्रहरीका अनुसार सिम्रौनगढको पर्साटोलबाट इटवालतर्फ जाँदै गरेको बिआरएडी ५६४२ नम्बरको भारतीय मोटरसाइकल आफैं अनियन्त्रित भई दुर्घटना भएको थियो । मोटरसाइकल उनका छोरा २५ वर्षीय तबरेज अन्सारीले चलाईरहेका थिए भने खातुन पछाडि सवार थिइन् ।
दुर्घटनामा छोरा अन्सारीलाई सामान्य चोटपटक समेत नलाग्दा आमा खातुन भने टाउकोको चोटका कारण गम्भीर घाइते भइन् । उनलाई तत्काल उपचारका लागि वीरगञ्जस्थित एनएमसी अस्पताल लगिएको थियो ।
अस्पतालमा उपचाररत खातुनको स्वास्थ्य अवस्था सुधार नभई जटिल बन्दै गएपछि आफन्तले एम्बुलेन्समा राखेर घरतर्फ ल्याउँदै गरेको अवस्थामा मृत्यु भएको बाराका प्रहरी प्रवक्ता एवम् प्रहरी नायब उपरीक्षक मिनबहादुर घलेले जानकारी दिए । मृतकको शव घर ल्याईसकेपछि आफन्तले प्रहरीलाई खबर गरेका थिए ।
प्रतिक्रिया दिनुहोस !
