दक्षिण कोरियाको अनुभवको अगाडि फिक्का पर्‍यो चेक रिपब्लिक, अग्रता जोगाउन नसक्दा पराजित

काठमाडौं : फिफा विश्वकप–२०२६ अन्तर्गतको दोस्रो खेलमा दक्षिण कोरियाले चेक रिपब्लिकलाई २–१ ले पराजित गरेको छ । समूह ‘ए’ अन्तर्गतको दोस्रो खेलमा अनुभवी दक्षिण कोरियाले चेक रिपब्लिकलाई हराउँदै विजयी सुरुवात गरेको हो । 

गुआडालाजारा स्टेडियममा भएको खेलमा पहिलो हाफ गोलरहित बराबरीमा सकिएको थियो । दोस्रो हाफको सुरुवातमा नै चेक रिपब्लिकले अग्रता बनाएको थियो । उक्त अग्रता जोगाउन नसक्दा २ गोलसहित हार बेहोरेको हो । खेलको ३८ औं मिनेटमा सन ७ नम्बरले हानेको प्रहार क्रस बार माथिबाट बाहिरियो । 

खेलको ३९ औं मिनेटमा सनले २ डिफेन्डरलाई बिट गर्दै हानेको प्रहार पहिलो बार हुँदै बाहिरियो । लगातार प्रयास गरे पनि कोरियाको सटले पोष्टको जाली चुम्न सकेको छैन । खेलको ४२ औं मिनेटमा चेकियाले डि बक्स बाहिर राम्रो स्थानमा फ्रि किकको सदुपयोग भने हुन सकेन । कोरियाले त्यसलाई डिफेन्ड गर्‍यो । 

पहिलो हाफमा गोल निकाल्न नसके पनि कोरिया निकै राम्रो सटहरु प्रहार गरेको थियो चेक रिपब्लिकको तर्फबाट क्लियर सटहरु देखिएन । दोस्रो हाफमा पनि कोरिया खेलमा हाबी रह्यो। खेलको ४९ औं मिनेटमो कोरियाले निकै राम्रो मौका गुमायो । लि जे सङले फिनिस गर्न सकेनन् । 
खेलको ५९औं मिनेटमा चेक रिपब्लिकले गोल गरेको छ ।

चेक रिपब्लिका कप्तान लादिस्लाभ क्रेजीले गोल चेक रिपब्लिकलाई अग्रतामा ल्याएका थिए । २० वर्षपछि विश्वकप खेलिरहेको चेक रिपब्लिकको लागि यो निकै राम्रो संकेत थियो । तर चेक रिपब्लिकले उक्त अग्रता जोगाउन सकेन । खेलको ६७ औं मिनेटमा दक्षिण कोरियाले आफ्नो विश्वकपको अनुभव देखायो । दक्षिण कोरियाको लागि ह्वाङ इन बेओमले गोल गर्दै खेललाई बराबरीमा ल्याएका थिए । 

खेलको ७८ औं मिनेटमा चेक रिपब्लिक खेल फर्कन चाहन्थ्यो । सेट पिसमा आएको बललाई हेडरमार्फत गोलमा परिणत गर्न खोज्दा भिडियो रेफ्रिले गोल अस्विकार गरेका हुन् । गोल अफसाइड घोषित भयो ।  त्यसको फाइदा उठाउँदै कोरियाले ८० औं मिनेटमा दक्षिण कोरियाको लागि ओ ह्योन ग्युले गोल गर्दै कोरियालाई २–१ को स्थितिमा ल्याएका थिए ।  

नियमित खेलमा थप गरिएको ६ मिनेटको इन्जुरी समयको तेस्रो मिनेटमा दक्षिण कोरियाका गोलकिपरले उत्कृष्ट बचाव गर्दै टिमको जित सुनिश्चित गरेका हुन् । यो खेलमा इन्जुरी समयमा १ मात्र पहेंलो कार्डको प्रयोग भयो । इन्जुरी समयमा चेक रिपब्लिकका खेलाडीलाई फाउल गर्दा दक्षिण कोरियाका खेलाडी ली गि ह्युकले पहेंलो कार्ड पाएका थिए ।

२० वर्षपछि विश्वकप खेलिरहेको चेक रिपब्लिक ११ औैं विश्वकप खेलिरहेको दक्षिण कोरियासँग हार बेहोर्‍यो ।  आज भएको पहिलो खेलमा म्याक्सिकोले दक्षिण अफ्रिकालाई २–० ले हराएको थियो । यो खेलमा भने ३ वटा रातो कार्ड प्रयोग भएको थियो । दक्षिण अफ्रिकाका २ खेलाडीले रातो कार्ड पाउँदा सहआयोजक मेक्सिकोका १ खेलाडीले रातो कार्ड व्यहोरेका थिए ।